الماتىلىق ۇستاز حيميا ءپانىن ەرەكشە ادىسپەن وقىتادى
جاپوندىق انيمە كەيىپكەرلەرىمەن تۇسىرگەن بەينە روليكتەرىنە بالالار مەن اتا- انالار بىردەن قىزىعۋشىلىق تانىتىپ، Tik-Tok-عى وقىرماندارى ءبىر جارىم ايدا 200 مىڭعا جەتكەن. ەرەكشە ءادىستىڭ سىرى نەدە؟
گۇلجان كولەن قىزى، ءتىلشى:
- 28 جاستاعى ۇلان ۇسەنوۆ 6 -جىلدان بەرى مەكتەپتە حيميا پانىنەن ساباق بەرەدى. ەكىنىڭ ءبىرىنىڭ ءتىسى باتىپ، تۇسىنە المايتىن ءپاندى تەز ۇعىندىرۋ ءادىسى تۋرالى بۇرىننان ويلاپ ءجۇرىپتى. سوڭىندا بالالاردىڭ ءسۇيىپ كورەتىن جاپوندىق تانىمال «نارۋتو» مۋلتفيلمىنىڭ جەلىسىن پايدالانىپ، بەينەروليكتەر ءتۇسىرىپ، Tik-Tok جەلىسىنە جۇكتەي باستاعان. كوپ سوزدەن گورى، ناقتى مىسالمەن تۇسىندىرەتىن ءتاسىلى از ۋاقىتتا كوپتىڭ قولداۋىنا يە بولىپتى.
ۇلان ۇسەنوۆ، حيميا ءپانىنىڭ ءمۇعالىمى:
- قۇرامنىڭ وزگەرۋىنە اكەلەتىن ءتۇرلى حيميالىق رەاكسيالار بار. «نارۋتودا» سونداي كەيىپكەر بار. وزىنەن بىرنەشە وبرازداردى شىعارا الادى، سولاي كوبەيەدى. بىلايشا ايتقاندا، ول جالعىز بولدى، باسقا وبرازدار ونىڭ ىشىندە بولادى. حيميادا ۇلكەن زاتتاردىڭ مايدا زاتتارعا بولىنەتىنى بار. ول ىدىراۋ رەاكسياسى دەپ اتالادى. حيميا مەن انيمەنى وسىلاي قاتار الىپ، تۇسىندىرۋگە بولادى. حيميالىق زاڭدىلىقتار بالالاردىڭ قابىلداۋىنا وڭاي بولۋ ءۇشىن ۇلان رەپ جانرىن دا قولدانادى. سوزدەرىن دە ءوزى جازادى. رەپپەن تۇسىندىرىلگەن العاشقى بەينەساباعىن 1 ميلليون ادام تاماشالاعان.
«جاڭا ءادىس ارقىلى حيمياعا بەت بۇرعان وقۋشىلارىمنىڭ قاتارى ارتتى»، - دەيدى ول.
ۇلان ۇسەنوۆ، حيميا ءپانىنىڭ ءمۇعالىمى:
- الەۋمەتتىك جەلىدەگى كورەرمەندەردىڭ %99 ءى جاقسى پىكىر ءبىلدىردى. بالالار حيميانى ەندى تۇسىنگەندەرىن جازىپ جاتتى. ارينە، حيميانى تولىقتاي ۆيدەومەن تۇسىندىرۋگە تىرىسپايمىن. بۇل بولاشاقتىڭ ەنشىسىندە. ۇلاننىڭ قازىر حيميا ءپانىن تۇسىندىرەتىن 30 عا جۋىق بەينەروليگى بار. الەۋمەتتىك جەلىنى جەڭىل دۇنيە دەپ قارايتىندار بار.
«شىن مانىندە، ءبىر بەينەروليكتى ءتۇسىرىپ، ونى مونتاجداۋعا 4 ساعات ۋاقىت كەتەدى»، - دەيدى جاڭاشىل ۇستاز.
