ناۋرىزدان باستاپ كوروناۆيرۋسقا بايلانىستى شەكتەۋ بىرتىندەپ جەڭىلدەيدى

نۇر-سۇلتان. قازاقپارات – تۇركيادا ەنگىزىلگەن شەكتەۋلەر ناۋرىزدان باستاپ جەرگىلىكتى ەپيدجاعدايعا قاراي بىرتىندەپ جەڭىلدەي باستايدى.

بۇل تۋرالى ەل پرەزيدەنتى رەجەپ تايپ ەردوعان ايتتى، - دەپ حابارلايدى ريا نوۆوستي.

بۇگىندە تۇركيادا جۇمىس كۇندەرى جانە جۇما مەن دۇيسەنبى ارالىعىندا 21.00 دەن 5.00 گە دەيىن كومەندانتتىق ساعات ەنگىزىلگەن. ودان بولەك، تۇركيادا ماسكا تاعۋ جانە الەۋمەتتىك قاشىقتىقتى ساقتاۋ رەجيمى بار. مەيرامحانا، كافە، تۇنگى كلۋبتار مەن باسقا دا كوڭىل كوتەرۋگە ارنالعان مەكەمەلەر جابىق، قوعامدىق تاماقتانۋ ورىندارى جەتكىزۋ قىزمەتى بويىنشا جۇمىس ىستەيدى.

«كوروناۆيرۋسپەن كۇرەس ديناميكاسى مەن ءبىزدىڭ جۇمىستى ەسكەرە وتىرىپ، ناۋرىزدان باستاپ شەكتەۋدى بىرتىندەپ جەڭىلدەتۋدى باستايمىز. ءبىز وڭىرلەردى ءتورت ساناتقا بولدىك. وسى توپتار بويىنشا جەكە- جەكە شەشىم شىعارىلادى»، - دەدى ەردوعان.

سونىمەن قاتار، ەل پرەزيدەنتى الداعى كۇندەرى مەيرامحانا، كافە جانە باسقا دا مەكەمەلەردى اشۋعا ارنالعان جول كارتاسى قابىلداناتىنىن ايتتى.

ونىڭ سوزىنشە، تۇركيادا كوروناۆيرۋسقا قارسى ۆاكسينا 5,5 ميلليون ادامعا سالىنعان.