ب ۇ ۇ دۋباي بيلەۋشىسى قىزىنا قاتىستى جاعدايدى تەرگەۋدى تالاپ ەتتى
ب ۇ ۇ ادام قۇقىقتارى جونىندەگى جوعارعى كوميسسارى باسقارما وكىلى رۋپەرت كولۆيللدىڭ ايتۋىنشا، ۇيىم BBC ۇلى بريتانيالىق تەلەراديوكومپانياسى جاريالاعان حانشايىمنىڭ ۆيدەوۇندەۋىن ەگجەي- تەگجەيلى تالداعاننان كەيىن جاعدايعا ارالاسۋعا شەشىم قابىلدادى. ۆيدەودا ول اكەسىن دۋبايدا ءۇي قاماۋىندا ۇستاپ وتىر دەپ ايىپتاعان.
كەلىنشەكتىڭ ايتۋىنشا، 2018-جىلى پاتشالىقتان قاشۋعا تىرىسقاننان كەيىن باس بوستاندىعىنان ايىرىلعان. ول قازىرگى ۋاقىتتا ۆيللادا قاماۋدا وتىرعانىن ايتتى. ءۇي تەرەزەلەرى جانە ەسىگى تورمەن جابىلعان. ءۇي ىشىندە كۇزەت بارىن جانە تەك دارەتحانادا جەكە قالاتىنىن حابارلادى. ۆيدەودا حانشايىم ءوزى ءومىرى ءۇشىن قورقاتىنىن ايتادى.
لاتيفا جولداعان ۆيدەوۇندەۋدى BBC تەرگەۋ باعدارلاماسىنا ونىڭ جاقىن دوسى تيينا ياۋحياينەن، اناسىنىڭ نەمەرە اعاسى ماركۋس ەسسابري جانە Free Latifa («لاتيفاعا بوستاندىق») بەلسەندىسى دەۆيد حەي جەتكىزدى. ولار لاتيفانىڭ قاۋىپسىزدىگىنە الاڭدايتىنىن، سوندىقتان بۇل حابارلامانى جاريالاۋدى ۇيعارعانىن مالىمدەدى.
وسىدان كەيىن ۇلى بريتانيا پرەمەر-ءمينيسترى بوريس دجونسون حانشايىمنىڭ تاعدىرىنا الاڭدايتىنىن ايتتى. ءبىراق اسىعىس قادام جاساماي، ب ۇ ۇ تەرگەۋىنىڭ قالاي جالعاساتىنىن كۇتىپ، شەشىم شىعاراتىنىن مالىمدەدى.
2019-جىلى دۋباي ءامىرىنىڭ التىنشى ايەلى دە ۇلى بريتانياعا قاشىپ بارىپ، ۇلى بريتانيالىق سوتتا جۇبايىنا قارسى ءىس قوزعاعان ەدى.
