توكيو وليمپياداسىنىڭ مەدالى قانداي بولادى؟

نۇر-سۇلتان. قازاقپارات - توكيوداعى جازعى وليمپيادا ويىندارىن ۇيىمداستىرۋشىلار جەڭىمپاز سپورتشىلار موينىنا تاعىلاتىن مەدالداردىڭ ۇلگىسىن كوپشىلىك نازارىنا ۇسىندى.

توكيو ويىندارىنىڭ ەمبلەماسى مەن ءداستۇرلى يتيماتسۋ ۇلگىسى مەدالدىڭ قاق ورتاسىندا ورنالاسقان.

ايتا كەتەيىك، مۇنداي ديزايندى جاپوندىقتار جازعى سپورت ويىندارىن وتكىزۋگە دايىندىق بارىسىندا، ياعني 2019-جىلى ۇسىنعان.

ال ءداستۇرلى شارا بىلتىر جازدا ءوتۋ ءتيىس بولعانىمەن، كوروناۆيرۋس پاندەمياسى ونىڭ ۇيىمداستىرىلۋىنا وزىندىك اسەرىن تيگىزدى. باستاپقى كەزدە بۇل شارانى مۇلدەم توقتاتىپ تاستاۋ ماسەلەسى كوتەرىلدى.

كەيىننەن رەسمي توكيو وليمپيادا وتكىزۋ قۇقىعىن ساقتاي وتىرىپ، ونى جاي عانا كەيىنگە شەگەرۋ شەشىمىن قابىلدادى.

ال مەدالدارعا قاتىستى قىزىقتى ءساتتىڭ ءبىرى 2019-جىلى بولدى: جەرگىلىكتى تۇرعىندار مەدال جاساۋ ءۇشىن ەكى جىل بويى اقاۋلى سمارتفوندار مەن پلانشەتتەردى جانە كومپيۋتەرلەردى جيناۋدى قولعا الدى. ءسويتىپ، بىرلەسكەن كۇش-جىگەردىڭ ارقاسىندا جينالعان 80 مىڭنان استام گادجەتتىڭ باعالى مەتالدارى الىنىپ، مەدال جاساۋ ءۇشىن بالقىتىلدى.

prosports.kz