تۇرعىن ءۇي نارىعىنداعى باعا نەشە پايىزعا ءوستى
بۇل تۋرالى ءماجىلىس دەپۋتاتتارىنىڭ رەسمي ساۋالىنا وراي ق ر باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك ءجۇمانعاريننىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«2020 -جىلعى قىركۇيەكتە مەملەكەت باسشىسى قازاقستان حالقىنا جولداۋىندا 2021 -جىلدىڭ وزىندە ءبىرىڭعاي جيناقتاۋشى زەينەتاقى قورىنىڭ 700 مىڭ سالىمشىسى جيناعىنىڭ ءبىر بولىگىن تۇرعىن ءۇي الۋعا جۇمساي الاتىنىن مالىمدەدى. 2020 -جىلعى قىركۇيەكتەن باستاپ 2021 -جىلعى قاڭتار ارالىعىنداعى كەزەڭدە باستاپقى تۇرعىن ءۇي نارىعىنداعى باعالاردىڭ ءوسۋى 5 پايىزدى قۇرادى، ال 2019 جانە 2020 -جىلداردىڭ ۇقساس كەزەڭىندە ول 3 پايىزدان اسقان جوق»، - دەدى ول.
الايدا، اگەنتتىك ءتوراعاسى 5 ايدىڭ ىشىندە باعالاردىڭ جوعارى ءوسۋى قايتالاما تۇرعىن ءۇي نارىعىندا بايقالعانىن، ونىڭ 12,5 پايىزعا جەتكەنىن ايتادى.
«بۇل رەتتە، قانداي دا ءبىر باعالىق ءسوز بايلاسۋدى قايتالاما تۇرعىن ءۇي نارىعىنا قاتىسۋشىلاردىڭ ايتارلىقتاي سانى (پاتەرلەردى ساتۋ تۋرالى 130 مىڭنان استام حابارلاندىرۋ) جوققا شىعارادى جانە تۇرعىن ءۇي باعالارىنىڭ ءوسۋىنىڭ نەگىزگى سەبەبى سۇرانىستىڭ كۇرت ارتۋى بولىپ تابىلاتىنىن كورسەتتى. ايتالىق، ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەكتەرىنە سايكەس، الۋ ءۇشىن قولجەتىمدى زەينەتاقى جيناقتارىنىڭ جالپى سوماسى شامامەن 1,4 تريلليون تەڭگەنى قۇرايدى. بۇل رەتتە، وسى جىلعى اقپاننىڭ باسىندا زەينەتاقى قورىنان 386,4 ميلليارد تەڭگە اۋدارىلدى»، - دەدى اگەنتتىك باسشىسى.
ەسكە سالساق، بۇعان دەيىن قازاقستاندا تۇرعىن ءۇي باعاسى قىمباتتاعانى تۋرالى حابارلادىق. قاڭتار ايىندا وتكەن ۇكىمەت وتىرىسىندا پرەزيدەنت قاسىم- جومارت توقايەۆ باسپانا باعاسىنىڭ شارىقتاۋىنا توسقاۋىل قويۋدى تاپسىرعان بولاتىن.
اۆتور: مارلان جيەمباي
