ۇلتتىق بانك قاڭتاردا قانداي ونىمدەر قىمباتتاعانىن ايتتى
ۇلتتىق بانك مالىمەتىنشە، 2021 -جىلى قاڭتاردا ينفلياتسيا 0,6 پايىز بولدى، جىلدىق كورسەتكىش وتكەن جىلعى جەلتوقسانداعى 7,5 پايىزدان 7,4 پايىزعا دەيىن ءسال باياۋلادى.
«ينفلياتسياعا نەگىزگى ۇلەستى ازىق- تۇلىك تاۋارلارىنا باعانىڭ ءوسۋى قوسادى، قاڭتاردا 11,4 پايىزعا دەيىن ازداعان ۇدەۋ تىركەلدى. كۇنباعىس مايىنىڭ (38,6 پايىز، ج/ج)، قانتتىڭ (34,9 پايىز)، جۇمىرتقانىڭ (27,2 پايىز)، كوكونىستەردىڭ (16,0 پايىز) ودان ءارى قىمباتتاۋى بايقالدى. جىلدىق دەفلياتسيالىق ديناميكا كۇرىشكە(-1,0 پايىز)، قۇس ەتىنە (-0,4 پايىز) ساقتالدى»، - دەلىنگەن ەسەپتە.
ۇلتتىق بانك وسىمدىك مايى باعاسى نەگە جوعارى ەكەنىن ءتۇسىندىردى.
«ىشكى نارىقتا كۇنباعىس مايىن ءوندىرۋ 2020 -جىلى وتكەن جىلمەن سالىستىرعاندا ءىس جۇزىندە وزگەرگەن جوق، الايدا يمپورت كولەمى قىسقاردى جانە ەكسپورت ءوستى. وتاندىق اۋىل شارۋاشىلىعى وندىرۋشىلەرىندە سوڭعى ايلاردا مايلى داقىلداردىڭ، سونداي-اق جەكە جىلىجاي كوكونىستەرى مەن كارتوپتىڭ قىمباتتاۋى بايقالدى»، - دەدى بانك ساراپشىلارى.
اقپارات بويىنشا، ازىق- تۇلىككە جاتپايتىن جىلدىق ينفلياتسيا 2021 -جىلعى قاڭتاردا 5,3 پايىزعا دەيىن باياۋلادى.
«ينفلياتسيا قۇرىلىمىندا ازىق- تۇلىك ەمەس تاۋارلاردىڭ كوپشىلىگى قالىپتى ءوسۋ قارقىنىن كورسەتتى. ءدارى- دارمەكتەر مەن جەكە تاۋارلار باعاسىنىڭ ءوسۋى ءبىرشاما باياۋلادى. سونىمەن قاتار، قۇرىلىس ماتەريالدارىنىڭ قىمباتتاۋى بايقالدى. ءالسىز سۇرانىس جاعدايىندا، سونداي- اق وتكەن جىلعى قاڭتاردا بەنزينگە اكتسيزدەر وسكەن كەزدەگى جوعارى بازانى قوسا، بەنزين (-0,2 پايىز) جانە ديزەل وتىنى (-7 پايىز) باعالارىنىڭ دەفلياتسيالىق سەرپىنى تىركەلدى»، - دەلىنگەن حابارلامادا.
ال اقىلى قىزمەتتەر باعاسىنىڭ جىلدىق ءوسۋى 4,1 پايىزعا دەيىن باياۋلاعان
«رەتتەلەتىن كوممۋنالدىق قىزمەتتەرگە تاريفتەردىڭ ءوسۋ قارقىنىنىڭ 2020 -جىلعى جەلتوقسانداعى 1,6 پايىزدان قاڭتاردا ەلەكتر ەنەرگياسى باعاسىنىڭ تومەندەۋى ناتيجەسىندە 1,2 پايىزعا دەيىن باياۋلادى.
سونىمەن قاتار، قاڭتاردا سۇرانىستىڭ تومەندەۋىنە جانە وتكەن جىلدىڭ جوعارى بازاسىنا بايلانىستى كولىك قىزمەتتەرى باعاسى ءوسۋىنىڭ باياۋلاۋى جالعاستى.
اتاپ ايتقاندا، اۆتوموبيل كولىگى قىزمەتتەرىنىڭ ۇلەسى تومەندەدى، اۋە كولىگى قىزمەتتەرىنە دەفلياتسيالىق ديناميكا ساقتالدى. سونىمەن قاتار، سەرۆيستىك ينفلياتسياعا تۇرعىن ءۇيدى جالعا الۋدىڭ قىمباتتاۋى (12,1 پايىز، ج/ج) جوعارى ۇلەس قوستى»، - دەلىنگەن ۇلتتىق بانك شولۋىندا.
