كيم چەن ىننىڭ جارى ۇزاق ۋاقىتتان كەيىن كوپشىلىك الدىنا شىقتى

نۇر-سۇلتان. قازاقپارات - ك ح د ر ليدەرى كيم چەن ىننىڭ جارى لي سول چجۋ اراعا ءبىر جىل سالىپ كوپشىلىك الدىنا شىقتى، ول كۇيەۋىمەن بىرگە ك ح د ر- دا مارقۇم كوشباسشى كيم چەن ءيردىڭ تۋعان كۇنىنە ارنالعان كونسەرتكە قاتىستى.

بۇل تۋرالى سولتۇستىك كورەيانىڭ ورتالىق تەلەگراف اگەنتتىگىنىڭ حابارلاماسىنان بەلگىلى بولدى، - دەپ جازدى ر ي ا نوۆوستي.

كورەي اگەنتتىگى كيم چەن ىن مەن ونىڭ ايەلى سەيسەنبىدە «مانسۋدە» كوركەم تەاترىندا جۇلدىز كۇنىنە ارنالعان كونسەرتتى جوعارى باسشىلىقپەن جانە پارتيانىڭ ورتالىق كوميتەتىنىڭ مۇشەلەرىمەن بىرگە كورگەنىن حابارلادى.

«باس حاتشى جارى لي سول چجۋمەن بىرگە تەاتردىڭ كورەرمەن زالىنا كىرگەن بويدا، بارلىق قاتىسۋشى «الاقاي!»، جولداس كيم چەن ىنعا جوعارى قۇرمەت كورسەتە وتىرىپ، وتان، ريەۆوليۋتسيا جانە حالىق الدىندا ۇلكەن جاۋاپكەرشىلىكپەن ءبىزدىڭ ۇلگىدەگى سوتسياليزم قۇرىلىسى دامۋىنىڭ جاڭا كەزەڭىن اشتى»، - دەلىنگەن حابارلامادا.

اگەنتتىك ماقالاسىنداعى سۋرەتتەردە لي سول چجۋ مەن كيم چەن ىن كورەرمەندەر زالىنىڭ ورتاسىندا قۇرمەتتى ورىنداردا بىرگە كۇلىپ وتىرعانى، شاپالاقتاعانى كورىنەدى. باس حاتشىنىڭ جارى كونتسەرتكە كوك ءتۇستى كوستيۋم كيىپ، اشەكەي تاققان. ءبىر قىزىعى، سۋرەتتەردە ودان باسقا ايەلدەر كورىنبەيدى. سونداي-اق، كورەرمەندەردىڭ ەشقايسى بەتپەردە تاقپاعان.

لي سول چجۋ سوڭعى رەت 2020-جىلدىڭ 25- قاڭتارىندا كوپشىلىك الدىندا پايدا بولعان. سول كەزدە دە ول كۇيەۋىمەن بىرگە اي جاڭا جىلىنا وراي «سامچجيەن» مۋزىكالىق تەاترىنىڭ مەرەكەلىك قويىلىمىنا بارعان.