جوعارعى سوتتا اكىمشىلىك ىستەر بويىنشا سوت القاسىن قۇرۋ ۇسىنىلدى
بۇل تۋرالى ءماجىلىستىڭ جالپى وتىرىسىندا «قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» ق ر كونستيتۋتسيالىق زاڭ جوباسىن ءبىرىنشى وقىلىمدا تالقىلاۋ كەزىندە ايتىلدى، دەپ حابارلايدى قازاقپارات ءتىلشىسى.
قۇجاتتى ءبىر توپ پارلامەنت دەپۋتاتتارى ازىرلەپ، زاڭ شىعارۋ باستاماسى تارتىبىمەن ەنگىزدى.
«اكىمشىلىك راسىمدىك-پروتسەستىك كودەكستى قابىلداۋ جانە ونى 2021-جىلعى 1- شىلدەدەن باستاپ قولدانىسقا ەنگىزۋ سوت جۇيەسىنىڭ جۇمىسىنا تۇزەتۋلەر ەنگىزۋدى تالاپ ەتەدى. قازاقستان رەسپۋبليكاسى جوعارعى سوتىنىڭ جانە وبلىستىق سوتتاردىڭ «قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى» كونستيتۋتسيالىق زاڭدا بەلگىلەنگەن قولدانىستاعى قۇرىلىمى اكىمشىلىك راسىمدىك-پروتسەستىك كودەكستىڭ مىندەتتەرىنە تولىق كولەمدە جاۋاپ بەرمەيدى»، - دەدى ءماجىلىسى دەپۋتاتى قانات مۋسين.
ونىڭ ايتۋىنشا، جوعارعى سوتتا اكىمشىلىك ىستەر بويىنشا سوت القاسىن قۇرۋ ۇسىنىلادى. قازىرگى مامانداندىرىلعان سوت القاسى تاراتىلادى.
«وبلىستىق سوتتاردا دا ءتيىستى سوت القالارى قۇرىلادى. بۇل شارا سوت جۇيەسىنە وڭىرلەردە ىستەردىڭ بولىنۋىنە بايلانىستى ۇنەمى وزگەرىپ وتىراتىن جاعدايعا جەدەل دەن قويۋعا مۇمكىندىك بەرەدى»، - دەپ ءتۇسىندىردى دەپۋتات.
