جاپونيادا قۇراستىرىلعان كولىكتەر ەلىمىزگە قىتاي ارقىلى جەتكىزىلدى
29 ۆاگوننان تۇراتىن كوممەرتسيالىق جۇكتى «ەۋروترانزيت» كومپانياسى «التىنكول» تەمىرجول بەكەتىندەگى تەرمينالىندا قابىلدادى.
وتكەن ايدا عانا جاپونياداعى زاۋىتتا قۇراستىرىلعان ايگىلى «تويوتا» مەن «لەكسۋس» اۆتوكولىكتەرى ەلىمىزگە قىتاي ارقىلى جەتكىزىلدى. شويىن جولمەن قىسقا مەرزىم ىشىندە اكەلىنگەن كولىكتەردى «ەۋروترانزيت» كومپانياسىنىڭ شەكاراداعى كولىك-لوگيستيكالىق ورتالىعى قابىلداپ الدى.
بۇل جەردەگى ينفراقۇرىلىم الدىن-الا دايىندالعاندىقتان، بارلىق پروتسەسستەر جىلدام ءارى حالىقارالىق تالاپتارعا ساي اتقارىلدى.
سەرگەي زيابلوۆ، «Toyota Motor Kazakhstan» ج ش س باس مەنەدجەرى:
- وسىعان دەيىن جاپوندىق جاڭا كولىكتەر كەمەگە تيەلىپ، مۇحيتپەن سۋەتس كانالى ارقىلى تۇركياعا باراتىن. ودان كەيىن قارا تەڭىزبەن رەسەيگە ءتۇسىرىلىپ، جۇك كولىكتەرىنە نەمەسە پوەزدارعا قايتا تيەلىپ قازاقستانعا جەتكىزىلەتىن. سونىڭ بارلىعىنا 80 كۇن كەتەتىن ەدى. ارينە وتە ۇزاق ۋاقىت. ال وسى قىتاي تەمىرجولى مارشرۋتىمەن تاسىمالداۋ 35-40 كۇنگە قىسقاردى. قازىر 220 كولىك كەلدى. الەمدىك اۆتوكونتسەرنمەن سەرىكتەس بولۋ كومپانيا ءۇشىن ۇلكەن مارتەبە جانە زور جاۋاپكەرشىلىك ەكەنى داۋسىز.
كومپانيانىڭ «التىنكول» بەكەتىندەگى تەرمينالى زاماناۋي قۇرالدارمەن جابدىقتالعان. وتكىزۋ مۇمكىندىگى كەڭەيتىلىپ، ءبىر كۇندە قىتايدان كەلەتىن تاۋارلى جۇك پوەزدارىنىڭ سانى ەكى ەسەگە ارتتى.
ەرلان ديحانبايەۆ، «eurotransit KTC» ج ش س باس ديرەكتورى:
- بۇل مارشرۋت ەلىمىزدەگى ديللەرلىك ورتالىقتاردىڭ جۇمىسىنا وتە ىڭعايلى. جوبانى ىسكە اسىرۋ ارقىلى ءبىزدىڭ تەرمينالدا قوسىمشا جۇمىس ورىندارى اشىلدى. جالپى بۇل مارشرۋتپەن كولىك تاسىمالداۋ ءۇشىن ەكى جىل ەڭبەك ەتتىك. جۇكتى دۇرىس قابىلداپ، ءتۇسىرۋدى الدىن-الا سىناقتان وتكىزدىك. مامانداردى وقىتتىق. جاپونيا، قىتاي تاراپىمەن ۇنەمى كەلىسسوزدەر جاسالدى.
ⅩⅨ عاسىردا ۇلى جىبەك جولىنىڭ ساۋدا كەرۋەنى وسىلاي جاڭعىرۋدا. ساپا، جىلدامدىق جانە ۋاقىتقا نەگىزدەلگەن نارىق تالابى وسىنداي. ەندى بۇل باعىتپەن جىل سوڭىنا دەيىن 2 مىڭنان اسا تەمىر تۇلپار جەتكىزىلمەكشى.
24.kz
