بوكستان توكيو وليمپياداسىنا ىرىكتەۋ اينالىمىنىڭ فينالدىق كەزەڭى وتكىزىلمەيدى
حالىقارالىق وليمپيادا كوميتەتى مۇنداي شەشىمدى قابىلداۋىنا سپورتشىلاردىڭ دەنساۋلىعى مەن قاۋىپسىزدىگىن ساقتاۋ ماسەلەسى سەبەپ بولعان. ح و ك كوروناۆيرۋستى ينفەكتسياعا قاتىستى الەمدەگى احۋالدى ەسكەرە وتىرىپ، ايماقتىق ىرىكتەۋ تۋرنيرلەرىنەن بولەك جولدامانى رەيتينگ ارقىلى ۇلەستىرۋدى ءجون سانادى.
«ءبىز بارشاڭىزدىڭ بوكستان توكيو-2020 وليمپياداسىنا ىرىكتەۋ تۋرنيرلەرىن وتكىزۋگە قوسقان ۇلەسىڭىزدى جوعارى باعالايمىز. بۇل جولدا ءبىزدىڭ باستى باسىمدىعىمىز سپورتشىلار بولعانى انىق. وسى ورايدا، ح و ك حالىقارالىق جول قاتىناستارى مەن الەم ەلدەرىندەگى شەكتەۋلەردى تولىعىمەن زەرتتەدى. سوڭعى ون كۇن ىشىندە ءبىز ۇلتتىق وليمپيادالىق كوميتەتتەرمەن جانە فەدەراتسيالارمەن، تەحنيكالىق، مەديتسينالىق ماماندارمەن، سونداي-اق، بوكسشىلارمەن اقىلداسا كەلە، بوكستان وليمپياداعا ىرىكتەۋ تۋرنيرىنىڭ جوسپارىنا وزگەرىس ەنگىزدىك. وزگەرىس ەنگىزۋ بارىسىندا ءبىز ىرىكتەۋ تۋرنيرلەرىنىڭ اراسىنداعى دەمالىس ۋاقىتىنىڭ كەم دەگەندە 30 كۇنگە جەتۋىن، بوكسشىلاردىڭ ىرىكتەۋ دوداسىنا، سونداي-اق، وليمپيادا ويىندارىنا ءتيىستى دەڭگەيدە دايىندالۋىن باستى مىندەتتەر قاتارىنا قويدىق. سونىمەن قاتار، مەملەكەتتەر اراسىنداعى جول ساپارلارىنا شەكتەۋدىڭ ەنۋى مەن كارانتين تالاپتارىنىڭ وزگەرۋى سپورتشىلاردىڭ ءتيىستى دەڭگەيدە دايىندالۋىنا كەدەرگى كەلتىرەتىنى انىق بولدى»، - دەلىنگەن حابارلامادا.
وسىلايشا، 2021-جىلدىڭ ماۋسىمىنا جوسپارلانعان پاريجدەگى الەمدىك ىرىكتەۋ ءتۋرنيرى وتكىزىلمەيدى. فينالدىق ىرىكتەۋ سىنىندا ەرلەر 32، ايەلدەر 21 جولدامانى ساراپقا سالۋى ءتيىس بولاتىن. ەندى اتالعان جولدامالار وليمپيادالىق سالماقتار بويىنشا ءتورت قۇرلىققا (ازيا/وكەانيا، افريكا، ەۋروپا، امەريكا) تەڭ بولىنەدى.
بوكستان قازاقستان ايەلدەر كومانداسىنىڭ ەنشىسىندە 75 كەلىگە دەيىنگى سالماقتا نادەجدا ريابەتس ەنشىلەگەن جالعىز جولداما بار. قازىرگى ساتتە بوكستان قىزدار كومانداسىنىڭ وزگە مۇشەلەرىندە وليمپياداعا باراتىن مۇمكىندىك از. ويتكەنى، الەمدىك رەيتينگىدە ولاردىڭ شەكتى مەجەدەن ءوتۋ مۇمكىندىگى تومەن كورسەتىلگەن.
ناقتى شەشىم ايماقتىق ىرىكتەۋ تۋرنيرلەرى تۇگەل اياقتالعان سوڭ انىقتالماق. بۇگىنگە دەيىن ازيا/وكەانيا ايماعى مەن افريكاداعى ىرىكتەۋ دوداسى اياقتالدى. ال قۇرلىقتىق باسەكەلەر امەريكادا 10-16- مامىر ارالىعىندا، ال ەۋروپادا ماۋسىم ايىندا وتەدى دەپ بولجانعان.
ەسكە سالا كەتەيىك، قازاقستان ەرلەر كومانداسى يوردانيانىڭ اممان قالاسىندا وتكەن ايماقتىق ىرىكتەۋ تۋرنيرىندە بارلىق ليتسەنزياعا قول جەتكىزدى.
توكيو تورىندە ساكەن بيبوسىنوۆ (52 كەلى)، سەرىك تەمىرجانوۆ (57 كەلى)، زاكىر سافيۋللين (63 كەلى)، ابىلايحان ءجۇسىپوۆ (69 كەلى)، ءابىلحان امانقۇل (75 كەلى)، بەكزاد نۇرداۋلەتوۆ (81 كەلى)، ۆاسيلي لەۆيت (91 كەلى)، قامشىبەك قوڭقابايەۆ (91+ كەلى) سىنعا تۇسەدى.
