الەمدە كوروناۆيرۋس جۇقتىرۋ ەكى ەسەگە قىسقاردى
جىل باسىنان بەرى اۋرۋ جۇقتىرۋ ەكى ەسە قىسقارعان. ءبىراق جەر جاھاندى ۆيرۋستىڭ جاڭا شتامدارى جايلاپ بارادى. الەمدە كوروناۆيرۋس ىندەتىنە شالدىققاندار سانى كەشەدەن بەرى 300 مىڭ ادامعا جەتتى.
بۇل سوڭعى ءتورت ايدا تىركەلگەن ەڭ تومەنگى كورسەتكىش. بيىل ءبىر اپتادا اۋرۋ جۇقتىرعاندار سانى ەكى ەسە قىسقارعان. دۇنيەجۇزىلىك دەنساۋلىق ساقتاۋ ۇيىمىنىڭ باسشىسى مۇنداي ناتيجە ۆاكتسينالاۋ ناۋقانىنىڭ باستالۋى مەن قاراپايىم سانيتارلىق ەرەجەلەردىڭ ارقاسى دەيدى.
تەدروس ادحانوم گەبرەيەسۋس، د د س ۇ باسشىسى:
- ىندەتتىڭ ىلمەگىنە ىلىككەندەردىڭ قاتارى 5 اپتادان بەرى ازايىپ كەلەدى. ەگەر وتكەن جىلدىڭ سوڭىندا اپتاسىنا 5 ميلليون ادام ۆيرۋس جۇقتىرسا، قاڭتار ايىنىڭ باسىندا 2 ميلليون 600 مىڭ ادام كوۆيدكە شالدىققان. بۇل وتە جاقسى كورسەتكىش. ىندەتتىڭ باسەڭدەۋى ءۇندىستاندا دا بايقالادى. مۇنداي وزگەرىسكە الەمدىك ساراپشىلاردىڭ وزدەرى اڭ-تاڭ. ەگەر ۆيرۋس ۋشىققان كەزدە ەل بويىنشا تاۋلىگىنە 100 مىڭ ناۋقاس انىقتالسا، قىركۇيەكتەن بەرى ايماقتاعى دىمكاس جانداردىڭ قاتارى بىرنەشە ەسە قىسقارعان. ەندى ءبىر كۇندە 11 مىڭ ادام ۆيرۋس جۇقتىرىپ جاتىر. عالىمدار ەلدىڭ بارلىق وڭىرىندە اۋرۋدىڭ كۇرت تومەندەۋىنە ۇجىمدىق يممۋنيتەتتىڭ پايدا بولۋى سەبەپ دەيدى. حالىقتىڭ جاپپاي ماسكا تاعۋى دا ءوز سەپتىگىن تيگىزگەن. ماماندار ايماقتاعى ەپيد احۋالدىڭ جاقسارعانىمەن ارقانى كەڭگە سالۋعا ەرتە ەكەنىن ەسكەرتەدى. ماسەلەن، جۇرگىزىلگەن زەرتتەۋلەردىڭ ناتيجەسىندە ۆيرۋسقا شالدىققان ادام ىندەتتى قايتا جۇقتىرۋى ابدەن مۇمكىن.
سرينات رەددي، الەۋمەتتىك دەنساۋلىق ساقتاۋ قورىنىڭ باسشىسى:
- ءيا، دەنساۋلىق ساقتاۋ سالاسىنىڭ جۇمىسى ەداۋىر جەڭىلدەدى. جاعدايدىڭ قىركۇيەك ايىنان بەرى تۇراقتالا باستاعانىن كورىپ تۇرمىز. الايدا ۇجىمدىق يممۋنيتەتتىڭ پايدا بولعانى جايىندا سەنىممەن ايتا المايمىز. سوندىقتان بوساڭسۋعا ەرتە. قاۋىپ ءالى دە جوعارى. ماسەلەن، ينفەكتسيانىڭ مۋتاتسياعا ۋشىراۋى ءجيى تىركەلىپ جاتىر. سوندىقتان بارىنشا ساق بولۋىمىز كەرەك. يتالياداعى ەپيدەميولوگيالىق احۋال دا جەرگىلىكتى تۇرعىنداردى قۋانتىپ جاتىر. ەلدىڭ دەنساۋلىق ساقتاۋ مينيسترلىگى ءبىر كۇندە ورتا ەسەپپەن 400 مىڭعا جۋىق تۇرعىن كوروناۆيرۋس جۇقتىرعانىن ايتادى.
بۇل قاراشا ايىنان بەرگى ەڭ تومەن كورسەتكىش. ءبىراق كارى قۇرلىقتا كوروناۆيرۋستىڭ وڭتۇستىك افريكالىق شتاممى جىلدام تاراپ بارادى. ناۋقاستار اسىرەسە فرانتسيادا ءجيى انىقتالىپ جاتىر. جۋىردا ۇلى بريتانيادا ۆيرۋستىڭ بۇرىن كەزدەسپەگەن جاڭا ءتۇرى تاعى شىقتى. ەندى ماماندار قولدا بار ۆاكسينانىڭ بۇل شتامدارعا قارسى تيىمدىلىگىنە كۇمانمەن قاراي باستادى.
24.kz
