ديماشتىڭ يندونەزياداعى جانكۇيەرلەرى كۋميرىنىڭ ءانىن ۇلتتىق اسپاپتاردا ورىندادى

نۇر-سۇلتان. قازاقپارات - ءانشى ديماش قۇدايبەرگەننىڭ «ليۋبوۆ ۋستاۆشيح لەبەدەي» ءانى يندونەزيالىق گامەلانمەن ورىندالدى.

وسىلايشا، الىس شەتەلدەگى فان-كلۋب سۇيىكتى انشىسىنە زور قۇرمەتىن جولداپ وتىر، دەپ حابارلايدى قازاقپارات dimashnews.com سايتىنا سىلتەمە جاساپ.

گامەلان - ياۆا جانە بالي ارالدارىندا پايدا بولعان ءداستۇرلى يندونەزيالىق مۋزىكالىق انسامبل.

گامەلاننىڭ نەگىزىن بونانگ، گەندەر، گونگ، كەندانگ، كەنونگ، سارون، رەباب جانە باسقا دا مۋزىكالىق اسپاپتار قۇرايدى.

ولاردىڭ كەيبىرەۋلەرى قازاق حالىق مۋزىكالىق اسپاپتارىمەن ۇقساستىعى بار. مىسالى، رەباب - قوبىزعا ۇقساس ادەمى ىشەكتى اسپاپ، ال كەندانگ - قازاق داۋىلپازىنىڭ ويناۋ تەحنيكاسىنا ۇقساس ارنايى تەحنيكا قاجەت ۇرمالى اسپاپ.

«جاقىندا ديماشتىڭ يندونەزيالىق «DID» فان- كلۋبىنىڭ كيكي چان ەسىمدى بويجەتكەنى قازاقستاندىق ورىنداۋشى رەپەرتۋارىنداعى يگور كرۋتويدىڭ «ليۋبوۆ ۋستاۆشيح لەبەدەي» ءانىنىڭ اسپاپپەن ورىندالعان ۇنىنە گامەلان ورىنداعان اۋەندى قوستى. جاڭا كاراوكە-نۇسقاسىن ۇسىندى. كوپتەگەن Dears بۇل نۇسقانى وزدەرىنىڭ كاۆەرلەرىنە پايدالانادى»، - دەلىنگەن حابارلامادا.

بولاشاقتا كيكي چان ءاندى وزىنە ىڭعايلى ەتىپ شىرقاۋ ءۇشىن سيندەندى شاقىرۋدى جوسپارلاپ وتىر. فان- كلۋبقا قاتىسۋشىلاردىڭ ءبىرى نيتا تامرين ءماتىننىڭ يندونەزيالىق نۇسقاسىن جازىپ، جوسپاردى جۇزەگە اسىرۋ ءۇشىن سيندەنگە حابارلاستى.