اتلانت مۇحيتىنىڭ تۇبىندە العاشقى اۆتوكولىك جولى جاسالدى

نۇر-سۇلتان. قازاقپارات - فارەر ارالىندا تاڭعاجايىپ سۋ استى اۆتوموبيل تۋننەلى سالىندى.

187 مەتر تەرەڭدىكتە اتلانت مۇحيتىنداعى العاشقى اۆتوكولىك اينالما جولى جاسالدى.

كىشكەنتاي ارالداعى ۇلكەن جەتىستىك

فارەر ارالى - 18 ارالدان تۇراتىن ارحيپەلاگ، يسلانديا مەن شوتلانديا اراسىندا ورنالاسقان اۆتونوم قۇرىلىمى. حالىق سانى - 51 مىڭ ادام. 17 ارالدى حالىق مەكەندەيدى. رەسمي تۇردە دانيا كورولدىگىنىڭ قۇرامىنا كىرەدى، ءبىراق 1948-جىلدان باستاپ فارەر ارالى اكىمدىگى جەرگىلىكتى ماسەلەلەردى دەربەس تۇردە شەشىپ كەلەدى.

جولدىڭ ەڭ تىك بولىگى 5 پايىزدان اسپايدى

2002-جىلدان باستاپ فارەر ارالى بىرتىندەپ سۋ استى اۆتوموبيل تۋننەلىنە اۋىسا باستادى. بۇل كۇردەلى جانە قىمبات قۇرىلىم فارەر تۇرعىندارىنىڭ ءومىرىن ەداۋىر جەڭىلدەتۋگە جانە ارالدار اراسىنداعى قوزعالىس ۋاقىتىن جەدەلدەتۋگە قىزمەت ەتەدى.

سترەيموي مەن ەستۋروي ارالىنىڭ اراسىنداعى تۋننەل ەرەكشە بولادى. ول 11 شاقىرىمدىق نەگىزگى ءۇش جولدان تۇرادى جانە اتلانت مۇحيتىندا 187 مەتر تەرەڭدىكتە ورنالاسادى. اۆتوماگيسترال 2020-جىلى 19- جەلتوقساندا پايدالانۋعا بەرىلدى.

اتلانت مۇحيتىنداعى اينالما جول

جول اقىلى بولادى

جاڭا تۋننەلدەر جەلىسى ەل استاناسى تورسحاۆن مەن رۋناۆيك اراسىنداعى ءجۇرۋ ۋاقىتىن 74 مينۋتتان 16 مينۋتقا دەيىن نەمەسە 4,5 ەسە قىسقارتادى. بۇل كورشىلەس ارالعا ۇنەمى باراتىن جەرگىلىكتى تۇرعىندار ءۇشىن وتە ىڭعايلى.

سۋ استىندا، 180 مەتر تەرەڭدىكتە سالىنعان تاس جولى قاۋىپسىز بولۋى ءۇشىن جولدىڭ ەڭ تىك بولىگى 5 پايىزدان اسپايدى. فارەر ارالىندا قولدانىلاتىن تۋننەلدىڭ ۇزىندىعى 5-6 شاقىرىمدى قۇرايدى.

اتلانت مۇحيتىنداعى تانىمال دوڭگەلەك تۋننەلدەر جەلىسى فارەر ارالىنىڭ ينفراقۇرىلىمىنا سالىنعان ەڭ كوپ ينۆەستيتسيا بولدى. مارشرۋت بويىنشا ءجۇرۋ اقىلى بولادى. ءبىر باعىتقا ءجۇرۋ قۇنى 10 ەۋرو. جەرگىلىكتى تۇرعىندار ءۇشىن جىل سايىنعى جەڭىلدىكتەر جازىلادى.

فارەرلىكتەر جاڭا عيماراتتى ءمۇسىنشى تروندۋر پاتۋرسسوننىڭ مۇسىندەرىمەن جانە جارىق ەففەكتىلەرىمەن بەزەندىرگەن.

massaget.kz