13:30, 16 - اقپان 2021 | GMT +5
الماتىدا نان ساتىپ الۋعا شەكتەۋ قويىلدى
الماتى. قازاقپارات - الماتىدا نان ساتىپ الۋعا شەكتەۋ قويىلدى، دەپ حابارلايدى قازاقپارات ءتىلشىسى.
الماتى قالالىق كاسىپكەرلىك جانە ينۆەستيسيالار باسقارماسى تۇسىندىرگەندەي، قازىرگى ۋاقىتتا نان شىعاراتىن زاۋىت دۇكەندەرىندە نان ساتۋعا شەكتەۋ قويىلدى. ءبىر ادامعا بەس بولكەدەن ارتىق ساتىلمايدى.
«كەيبىر الىپساتارلار تاڭەرتەڭگى ۋاقىتتا بارلىق نان ونىمدەرىن ساتىپ العان. ارى قاراي ۇستىنە اقشا قوسىپ ساتۋ ءۇشىن وسىلاي ىستەيدى. دەسەك تە، «اقساي» نان زاۋىتى» ج ش س الەۋمەتتىك بولكەنىڭ سانىن ازايتقان جوق. زاۋىت قالا دۇكەندەرىن نانمەن تولىق قامتاماسىز ەتىپ وتىر» دەپ حابارلادى باسقارمادان.
الماتى قالالىق كاسىپكەرلىك جانە ينۆەستيسيالار باسقارماسى اتاپ وتكەندەي، اكىمدىك پەن «اقساي» نان زاۋىتى» ج ش س اراسىندا بۇرىن جاسالعان كەلىسىمشارت بار. وندا ءبىر بولكەنىڭ باعاسى 75 تەڭگە دەپ بەكىتىلگەن.
اۆتور: الما مۇقانوۆا
