دۇنيەجۇزىلىك ساۋدا ۇيىمىن العاش رەت ايەل ادام باسقارادى
نيگەريانىڭ بۇرىنعى قارجى ءمينيسترى جاڭا قىزمەتىنە 1-ناۋرىزدان باستاپ كىرىسەدى. ءوزىنىڭ ايتۋىنشا، وكوندجو- يۆەالا ەڭ الدىمەن الەمدىك ساۋدانىڭ كوروناۆيرۋس پاندەمياسىنان كەيىن قايتا قالپىنا كەلۋىنە ەرەكشە ءمان بەرەدى. جاڭا ءتوراعا دۇنيەجۇزىلىك ساۋدا ۇيىمىنىڭ قازىرگى ۋاقىتتا كوپتەگەن پروبلەمامەن بەتپە- بەت كەلىپ وتىرعانىن ەسكە سالدى. ونىڭ سوزىنە سەنسەك، ۇيىمداسقان ناتيجەلى جۇمىس بۇل ۇيىمدى الدەقايدا قۋاتتى، بۇگىنگى كۇنگە بەيىمدەلگەن بەلسەندى ەتەدى.
«بۇل جول وتە ۇزاق، اۋىر جانە بەلگىسىزدىككە تولى بولدى. ءبىراق جاڭا كۇن تۋدى، ەندى ناعىز جۇمىستى باستاۋعا بولادى. بۇگىندە دۇنيەجۇزىلىك ساۋدا ۇيىمىنا مۇشە مەملەكەتتەر تاريحتى ءوز قولىمەن جاساپ وتىر - ۇيىم قۇرىلعان 73 جىلدان بەرى العاش رەت ايەل ادام، افريكا وكىلى باسشىلىققا كەلدى. بۇل - ناعىز سەرپىلىس. مەن جاقسىلىققا سەنەم» دەدى نگوزي وكوندجو- يۆەالا.
جاڭا ءتوراعانى ەۋروكوميسسيا باسشىسى ۋرسۋلۋا فون دەر ليايەن قۇتتىقتادى. ول ءوز قۇتتىقتاۋىندا بۇل ءساتتىڭ تاريحي ماڭىزىن ەرەكشە اتاپ وتكەن. فون دەر ليايەننىڭ ايتۋىنشا، ەۋرووداق دۇنيەجۇزىلىك ساۋدا ۇيىمىنىڭ رەفورماسىن جاقتايدى جانە ەرەجەگە نەگىزدەلگەن كوپجاقتى ساۋدا جۇيەسىن قورعاۋعا كومەكتەسەدى. ايتا كەتەيىك، ۇيىم باسشىسىنىڭ لاۋازىمى وتكەن جىلدىڭ 31 -تامىزىنان بەرى بوس تۇرعان بولاتىن. سوڭعى ءتوراعا روبەرتۋازيەۆەدۋ سول كۇنى باسشىلىق ۋاقىتى اياقتالماسا دا، قىزمەتىنەن كەتتى.
