اقىن ءشومىشباي ساريەۆ دۇنيەدەن وزدى
بۇل قارالى حاباردى مادەنيەت جانە سپورت مينيسترلىگىنىڭ باسپا ءسوز قىزمەتى راستادى.
ءشومىشباي ساريەۆ 1946 -جىلى 15 -ساۋىردە قىزىلوردا وبلىسى، ارال اۋدانى، ءشومىش ستانساسىندا دۇنيەگە كەلگەن. ەڭبەك جولىن قازالى اۋداندىق «لەنين تۋى»، ارال اۋداندىق «تولقىن» گازەتتەرىنەن باستاعان. كەيىننەن «قازاقستان» باسپاسىنىڭ رەداكتورى، «جۇلدىز» جۋرنالى ءبولىمىنىڭ مەڭگەرۋشىسى، قازاقستان رەسپۋبليكاسى ۇلتتىق عىلىم اكادەمياسى مۇحتار اۋەزوۆ اتىنداعى ادەبيەت جانە ونەر ينستيتۋتىنىڭ عىلىمي، اعا عىلىمي قىزمەتكەرى بولعان.
1971 -جىلى قازم ۋ-دىڭ جۋرناليستيكا فاكۋلتەتىن بىتىرگەن. 1996 -جىلى «قازىرگى قازاق ليريكاسىنىڭ ىزدەنىستەرى» اتتى تاقىرىپتا عىلىم كانديداتى دارەجەسىن يەلەندى.
«XX عاسىردىڭ جيىرماسىنشى جىلدارداعى پوەزياسى» اتتى مونوگرافيا جازعان. قازىرگى ۋاقىتقا دەيىن م. و. اۋەزوۆ اتىنداعى ادەبيەت جانە ونەر ينستيتۋتىندا عىلىمي قىزمەتكەر بولدى. «عاشىقتار جىرى»، «بوزجورعا» اتتى اۆتورلىق بەينەتاسپاسى جارىق كوردى. گ. گۋليا، و. بەرگگولتس، ي. اباشيدزە، س. ۆيكۋلوۆ، ا. دەمەنتيەۆ، ف. اليەۆا، ر. روجدەستۆەنسكي، م. ەمينەسكۋ، ت. ب.
اقىنداردىڭ ولەڭدەرىن قازاق تىلىنە اۋدارعان. العاشقى جىر جيناعى 1974 -جىلى «بالداۋرەن» دەگەن اتپەن جارىق كورگەن. سودان بەرگى ارالىقتا قازاق، ورىس تىلدەرىندە ون بەس شاقتى كىتابى شىقتى. 1994 -جىلى «جازۋشى» باسپاسىنان تاڭدامالى ولەڭدەر تومدىعى، 1992 -جىلى «ءسۇيىنشى» دەگەن اتپەن ءان ولەڭدەرى جەكە جيناق بوپ باسىلعان. «تارلان» سىيلىعىنىڭ يەگەرى. قازاقستاننىڭ ەڭبەك سىڭىرگەن قايراتكەرى.
اۆتور: الما مۇقانوۆا
