گۆينەيادا ەبولا ەپيدەمياسى تارالا باستادى
ەلدىڭ دەنساۋلىق ساقتاۋ ءمينيسترى ءتوراعالىق ەتكەن وتىرىس بارىسىندا بەزگەكتىڭ تارالۋىمەن كۇرەسۋ ءۇشىن ءبىرقاتار ءىس-شارا قابىلداندى. وندا سىرقاتتاردى انىقتاپ، ولارمەن بايلانىستا بولعانداردىڭ بارلىعىن وقشاۋلاۋ كەرەگى ايتىلدى.
سانيتاريا قاۋىپسىزدىگى اگەنتتىگىنىڭ باسشىسى ساكوبا كەيتتىڭ ايتۋىنشا، ەبولا ۆيرۋسىن جۇقتىرعان جەتى وقيعا تىركەلدى. ولار - ءتورت ەر ادام مەن ءۇش ايەل. ءۇش ادام ءولدى. ۇشەۋى وقشاۋلاندى. ءبىر ناۋقاس كاناكريدە، ەكەۋى نزەرەكورەدە جاتىر.
گۆينەيانىڭ سانيتاريا وكىلدەرى ەبولا بەزگەگى العاش گۋەكە قالاسىندا مەدبيكەدەن انىقتالعانىن مالىمدەدى، ول 28- قاڭتار كۇنى قايتىس بولدى. ايەل ءبىرىنشى اقپاندا جەرلەندى.
«قوشتاسۋ راسىمىنەن كەيىن بىرنەشە كۇن وتكەن سوڭ بىرنەشە ادامدا سىرقاتتىڭ بەلگىلەرى بايقالعان، ياعني، ءىش ءوتۋ، قۇسۋ، قان كەتۋ جانە ىستىعى كوتەرىلۋ. ۆيرۋستىڭ بار-جوعىن انىقتاۋعا تاپسىرىلعان تەست ناتيجەسى العاش 12- اقپاندا راستالدى»، - دەدى ساكوبا كەيت.
دۇنيەجۇزىلىك دەنساۋلىق ساقتاۋ ۇيىمى گۆينەياعا كومەك كورسەتۋ ءۇشىن بار كۇش جۇمىلدىراتىنىن مالىمدەدى.
2014-2016-جىلدارى گۆينەيا باتىس افريكاداعى ەبولا ۆيرۋسىنىڭ تارالۋ وشاعىنا اينالدى. سول كەزدە بۇل وڭىردە ىندەتكە 28 مىڭ ادام شالدىعىپ، 11 مىڭ ادام قايتىس بولعان ەدى.
