ەلباسى جاستاردى سپورتپەن كوبىرەك شۇعىلدانۋعا شاقىردى

نۇر-سۇلتان. قازاقپارات - ەلباسى نۇرسۇلتان نازاربايەۆ جاستاردى جانە سپورتپەن كوبىرەك شۇعىلدانۋعا شاقىردى، دەپ حابارلايدى قازاقپارات.

«سپورتپەن شۇعىلدانۋ ارقىلى جەڭىسكە ۇمتىلىس، كۇش-قايرات، العا قويعان ماقساتقا جەتۋگە تالپىنىس سياقتى ماڭىزدى قاسيەتتەر جەتىلەدى. سپورت دەگەنىمىز - دەنساۋلىق، رۋحتىڭ كۇشتىلىگى، وتانسۇيگىشتىك. مەن جاستارىمىزدى دەنە شىنىقتىرۋمەن جانە سپورتپەن كوبىرەك شۇعىلدانۋعا شاقىرامىن»، - دەپ جازدى نۇرسۇلتان نازاربايەۆ Instagram - داعى پاراقشاسىندا.

ايتا كەتسەك، نۇرسۇلتان نازاربايەۆتىڭ سپورتقا دەگەن نازارى ەرەكشە ەكەنىن اتاپ ءوتۋ كەرەك.

وسىدان ءۇش جىل بۇرىن نۇرسۇلتان نازاربايەۆ «Challenge درۋگوي تى!» اتتى رەسپۋبليكالىق سپورت شاراسىنا قولداۋ كورسەتىپ، وسى اكسيانىڭ قاتىسۋشىلارىنا بەينەۇندەۋ جولداعان بولاتىن.

ول باستامانىڭ ماقساتى - ەلىمىزدىڭ تۇرعىندارى اراسىندا دەنە شىنىقتىرۋ مەن سالاۋاتتى ءومىر سالتىن ناسيحاتتاۋ.

اكسيا اياسىندا وتاندىق تانىمال سپورتشىلاردىڭ، ەلىمىزدىڭ مادەنيەت جانە ماسس-مەديا وكىلدەرىنىڭ قاتىسۋىمەن اشىق جاتتىعۋلار وتكىزىلگەن.