ماڭعىستاۋدىڭ زيالى قاۋىم وكىلدەرى بوزجىراعا قاتىستى پرەزيدەنتكە ۇندەۋ جولدادى

اقتاۋ. قازاقپارات - ماڭعىستاۋ وبلىسىنىڭ زيالى قاۋىم وكىلدەرى ق ر پرەزيدەنتى قاسىم-جومارت توقايەۆقا بوزجىرا اۋماعىنداعى جاڭا تۋريزم جوبالارىن قۇرۋىن قولداپ ۇندەۋ جولدادى، دەپ حابارلايدى قازاقپارات.

«اسا قۇرمەتتى قاسىم-جومارت كەمەل ۇلى! ءبىز، ماڭعىستاۋلىق زيالى قاۋىم وكىلدەرى، اتا- بابالارىمىزدىڭ جانە كەلەشەك ۇرپاعىمىزدىڭ الدىنداعى مىندەتتەر مەن جاۋاپكەرشىلىكتى سەزىنە وتىرىپ، وزىڭىزگە ۇندەۋ جولدايمىز. ماڭعىستاۋ ءوڭىرى - قازاقستانداعى ءتۋريزمدى دامىتۋعا قولايلى ايماقتاردىڭ ءبىرى ەكەندىگى ايگىلى.

بيىل تەڭىز جاعالاۋىندا بەس جۇلدىزدى Rixos قوناق ءۇيىنىڭ اشىلۋىمەن، وڭىرگە كەلگەن تۋريستەر سانى ارتتى. كەلگەن ساياحاتشىلار ماڭعىستاۋدىڭ تابيعي جەرلەرىن دە ارالاپ، اسىرەسە بوزجىرا شاتقالىنا قىزىعۋشىلىق تانىتتى. وزىڭىزگە بەلگىلى، ينۆەستورلار تاراپىنان بوزجىرا اۋماعىندا جاڭا تۋريزم نىسانىن سالۋعا ۇسىنىس ءتۇسىپ، بۇگىنگى تاڭدا قوعام تاراپىنان قىزۋ تالقىلانۋدا.

ءبىز قاسيەتتى قانمەن قورعالعان كيەلى توپىراقتىڭ قۇتىن قاشىرۋعا جول بەرمەۋىمىز كەرەك. ول ۇرپاققا امانات. «جابايى» تۋريزمگە توقتاۋ سالىنۋى كەرەك.

سوندىقتان، ءسىزدىڭ تاپسىرماڭىز بويىنشا ارنايى عالىمداردان قۇرالعان توپ بوزجىرا ايماعىنا، ونىڭ فلوراسى مەن فاۋناسىنا زيان كەلتىرمەيتىن جوبانى ىسكە اسىرۋعا بولادى دەگەن قورىتىندىعا كەلدى. بۇل شەشىم حالىقتىڭ جۇرەگىنە جول تاپقانى ءسوزسىز. بۇل ۇسىنىس ءوڭىرىمىزدىڭ دامۋىنا وڭ ىقپالىن تيگىزەتىندىگىن بارلىعىمىز دا تۇسىنەمىز:

بىرىنشىدەن، مۇنايعا عانا تاۋەلدىلىكتى جويىپ، ءتۋريزمدى دامىتۋ ارقىلى ەكونوميكامىزدى وركەندەتەمىز. شاعىن جانە ورتا بيزنەستىڭ دامۋىنا، جەرگىلىكتى ازاماتتاردىڭ جۇمىسپەن قامتىلۋىنا جول اشامىز. قوناق ءۇي قۇرىلىسى جۇمىسى باستالسا، وسى ماڭداعى اۋىل تۇرعىندارىن جۇمىسپەن قامتۋعا مۇمكىندىك بار.

ەكىنشىدەن، بۇل كەشەن تۋريستەردىڭ بوزجىراعا ءوز بەتىنشە بەيبەرەكەت بارىپ، تابيعاتقا وراسان زيان كەلتىرۋىنە توسقاۋىل بولادى. سوندىقتان، بۇل ايماققا باراتىن جول سالىپ، تۋريستەردىڭ جايلى دەمالۋىنا جاعداي جاسالۋىمەن قاتار، زاڭنامالىق اكتىلەرمەن ءتيىستى قاعيدالاردىڭ بەكىتىلەتىنىنە سەنىمدىمىز. ياعني، بوزجىرا اۋماعىندا سالىناتىن تۋريزم ينفراقۇرىلىمى تابيعاتتى قورعاۋ، ساقتاۋ جانە جەرگىلىكتى تاريحي- تابيعي ورىنداردىڭ ساكرالدىلىعىن ساقتاۋ، جەرگىلىكتى ءدىل، تانىم- عۇرىپتىق قۇندىلىقتارىمىزدى ەسكەرە وتىرىپ، وركەنيەتتى جولمەن تۋريزم مادەنيەتىن قالىپتاسقانىن قالايمىز!

مارتەبەلى پرەزيدەنت مىرزا!

سوڭعى ايلاردا بوزجىرا ماڭعىستاۋدىڭ عانا ەمەس، تۇتاس ەلدىڭ باس تاقىرىبىنا اينالدى. سان ءتۇرلى پىكىر، جان-جاقتى وي ايتىلۋدا. بىرنەشە ايدان بەرى تالقىلانىپ، باسپا ءسوز بەتىندە تالاي جازىلدى. دۇرىس، بۇل - قوعام تالابى ءارى ءوزىڭىز ايتقان اشىقتىقتىڭ ناعىز كورىنىسى دەپ بىلەمىز.

ەندىگى كەزەكتە ەل بولىپ، ورتاق شەشىم قابىلداپ، نۇكتەسىن قوياتىن كەز كەلدى دەپ ويلايمىز. ەلدىگىمىز بەن اۋىزبىرشىلىگىمىز وسىندايدا سىنالادى. حالىقتىڭ پىكىرىن ەستىپ، جوبا جان- جاقتى زەرتتەلىپ، زەردەلەنگەننەن كەيىن عانا ىسكە اسىرۋعا شەشىم قابىلداعانىڭىز ءۇشىن وزىڭىزگە زور العىس ايتامىز! جوبانىڭ ساراپشىلار، قوعامدىق كەڭەستەر مەن جاۋاپتى سالا جەتەكشىلەرىنىڭ وي- پىكىرلەرىن ەسكەرە وتىرىپ جۇزەگە اسىرىلاتىندىعىنا سەنەمىز. بوزجىرانىڭ ساقتالۋى ءبىز ءۇشىن بولاشاق ۇرپاق الدىنداعى پارىز، سونداي-اق، بۇل جوبا ەلدىڭ دامۋى ءۇشىن كەرەك! ماڭعىستاۋلىقتار ماماندارمەن تىڭعىلىقتى تالقىلانعان، ساراپتالعان، ناقتىلانعان جوبانىڭ ىسكە اسىرىلۋىن دۇرىس دەپ بىلەدى جانە قولدايدى!» - دەلىنگەن ۇندەۋدە.

قۇرمەتپەن، زيالى قاۋىم وكىلدەرى:

بەكتۇر تولەۋعاليەۆ، جازۋشى، ق ر جازۋشىلار وداعىنىڭ مۇشەسى؛

سابىر اداي، اقىن، ق ر ەڭبەك سىڭىرگەن قايراتكەرى؛

ورىنباسار توقجانوۆ، ق ر ەكولوگيا سالاسىنىڭ ۇزدىگى؛

وتىنشى كوشباي، ەتنوگراف، ولكەتانۋشى؛

سۆەتقالي نۇرجان ايتمان ايتمان، اقىن، ق ر جازۋشىلار وداعىنىڭ مۇشەسى؛

عالىم ءارىپ، اقىن، ق ر جازۋشىلار وداعىنىڭ مۇشەسى؛

ايتۋار وتەگەنوۆ، اقىن، ق ر جازۋشىلار وداعىنىڭ مۇشەسى؛

نۇرلان قۇلباي، ولكەتانۋشى، ق ر مادەنيەت سالاسىنىڭ ۇزدىگى؛

ءانۋار بيماعامبەت، اقىن، ق ر جازۋشىلار وداعىنىڭ مۇشەسى؛

اندرەي استافيەۆ، تاريحشى، ارحەولوگ؛

سۇلتانبەك قۇدايبەرگەن، اقىن، ونەرتانۋشى؛

ساقىپ كەرەلبايەۆ، قوعام قايراتكەرى؛

قوجا-احمەت دەمەۋبەرگەن ۇلى، ق ر قۇرمەتتى جۋرناليستى؛

ەدىل جاڭبىرشين، دەپۋتات؛

سامات مۇسابايەۆ، دەپۋتات.