قازاقستان كاسىپقوي بوكس فەدەراتسياسىنىڭ باسشىلىعىنا قايرات رەيىموۆ كەلدى
رەيىموۆ قايرات نيەتباي ۇلىن «قازاقستان كاسىپقوي بوكس فەدەراتسياسىنىڭ» ۋاقىتشا پرەزيدەنتى ەتىپ سايلاۋ تۋرالى شەشىم كەشە الماتى قالاسىندا «قازاقستان كاسىپقوي بوكس فەدەراتسياسى» اتقارۋ كوميتەتىنىڭ اشىق وتىرىسىندا قابىلداندى.
وتىرىستا «قازاقستان كاسىپقوي بوكس فەدەراتسياسى» پرەزيدەنتىنىڭ مىندەتىن اتقارۋشى قىزمەتىنە كاسىپكەر رەيموۆتىڭ كانديداتۋراسىن قازاقستان كاسىپقوي بوكس فەدەراتسياسىنىڭ قۇرمەتتى پرەزيدەنتى - سەرىك قوناقبايەۆ ۇسىندى.
كاسىپتىك بوكس فەدەراتسياسىنىڭ اتقارۋ كوميتەتىنىڭ مۇشەلەرى ءبىراۋىزدان داۋىس بەردى. قايرات رەيىموۆ كاسىپقوي بوكس فەدەراتسياسىن دامىتۋدىڭ جاڭا تۇجىرىمداماسىن ۇسىندى.
اتاپ ايتقاندا، ول فەدەراتسيانىڭ اتقارۋ كوميتەتىنىڭ قۇرامىن كەڭەيتىپ، اتقارۋ كوميتەتىنىڭ جۇمىسىن جانداندىرماق. سونداي-اق، ۇزدىكسىز قۇقىقتىق جانە الەۋمەتتىك قورعاۋدى قامتاماسىز ەتىپ، كاسىبي بوكسشىلاردىڭ دەنساۋلىعى مەن ءومىرىن قازاقستان اۋماعىندا جانە ودان تىس جەرلەردە جۇيەلى تۇردە قاداعالاۋ ماسەلەسىن نازارعا الماق.
