قازاقستاندىقتار بۇگىننەن باستاپ جۇرگىزۋشى كۋالىگىنسىز كولىك جۇرگىزە الادى
ەسكە سالا كەتەيىك، 21- قاڭتاردا پارلامەنت سەناتىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسى ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» زاڭى ەكى وقىلىمدا قارالىپ، قابىلدانعان بولاتىن.
زاڭدا قازاقستان رەسپۋبليكاسىندا بەرىلگەن جۇرگىزۋشى كۋالىگى مەن كولىك قۇرالىن تىركەۋ تۋرالى كۋالىكتى وزىمەن بىرگە الىپ ءجۇرۋدى تالاپ ەتەتىن نورمانى قولدانىستاعى زاڭنامادان الىپ تاستاۋ ەسكەرىلگەن.
ياعني، اۆتوكولىك يەسىن پوليتسيا توقتاتقان كەزدە، ول جەكە كۋالىگىن ۇسىنىپ، سول جەكە كۋالىكپەن پوليتسيا قىزمەتكەرى پلانشەت ارقىلى ەلەكتروندىق بازادا ونىڭ قاجەتتى قۇجاتتارى بويىنشا تەكسەرۋ جۇرگىزە الادى.
وسى جىلى 1- اقپاندا مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسى ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
ال وسىدان ءبىر اپتا بۇرىن ىشكى ىستەر ءمينيسترى ەرلان تۇرعىمبايەۆ 13- اقپاننان باستاپ ەلىمىزدىڭ ازاماتتارىنا كولىكتى ءتيىستى قۇجاتتاردى الىپ جۇرمەي-اق، تەك جەكە كۋالىكپەن جۇرگىزۋگە بولاتىنىن جاريا ەتكەن ەدى.
