الەم چەمپيونى تيتۋلدارى بار قازاقستان تۋماسى كاسىپقوي بوكستان كەتىپ، وليمپياداعا قاتىسپاق

نۇر-سۇلتان. قازاقپارات - قازاقستان تۋماسى 30 جاستاعى كريستينا حاممەر (26-1، 12 ك و) كاسىپقويدان اۋەسقوي بوكسقا اۋىساتىنىن مالىمدەدى، دەپ حابارلايدى Vesti.kz.

سپورتشى گەرمانيا قۇراماسىنا قوسىلىپ، توكيوداعى وليمپياداعا بارماق نيەتتە. حاممەر 75 كەلىگە دەيىنگى سالماقتا ونەر كورسەتپەك.

«مەن كاسىپقويدان كەتىپ، گەرمانيانىڭ ۇلتتىق وليمپيادالىق قۇراماسىنا قوسىلامىن. توكيوعا جول 75 كەلىدە»، - دەپ جازىپتى بوكسشى Instagram جەلىسىندە.

ەسكە سالايىق، جەلتوقساندا حاممەر IBF بەلبەۋىن جانە WBC ۇيىمىنىڭ «ۋاقىتشا» چەمپيونى تيتۋلىن جەڭىپ العان. كاسىپقويدا ول ەكىنشى ورتا سالماقتا - 76,2 كەلىدە جۇدىرىقتاسادى.

كريستينا قاراعاندى وبلىسى نوۆودولينكا اۋىلىندا دۇنيەگە كەلگەن. بالا كەزىندە اتا-اتاناسىمەن گەرمانياعا قونىس اۋدارادى. دورتمۋندتا تۇرىپ جاتقان بوكسشى كاسىپقويعا 2009-جىلى وتكەن ەدى.