الەمدە پاندەميا ۇزاققا سوزىلماۋى ءتيىس - مامان

الماتى. قازاقپارات - الماتى قالاسى سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا ونلاين بريفينگ بارىسىندا جۋرناليستەردىڭ «الەمدەگى كوروناۆيرۋس پاندەمياسى جەتى جىلعا سوزىلا ما» دەگەن ساۋالىنا جاۋاپ بەردى، دەپ حابارلايدى قازاقپارات ءتىلشىسى.

بۇعان دەيىن شەتەلدىك باسىلىمداردىڭ بىرىندە كوروناۆيرۋس پاندەمياسى تاعى جەتى جىلعا سوزىلۋى مۇمكىن ەكەنى جايىندا ماقالا جاريالاندى.

ماقالادا مۇنداي سەناري بولماس ءۇشىن الەم حالقىنىڭ تورتتەن ءۇش بولىگىنە ۆاكسينا سالۋ كەرەك دەلىنگەن.

اسەل قالىقوۆانىڭ ايتۋىنشا، كوپ ەلدە حالىقتى يممۋنداۋ باستالدى، ونىڭ ىشىندە قازاقستان دا بار. وسىعان بايلانىستى ەپيدەميولوگ پاندەميا ۇزاق ۋاقىتقا سوزىلمايتىنىن اتاپ ءوتتى.

«ەپيدەميولوگ رەتىندە پاندەميا تاعى جەتى جىلعا سوزىلۋى مۇمكىن دەگەن مالىمدەمەمەن كەلىسپەيمىن. سەبەبى، كوپ ەلدە حالىقتى يممۋنداۋ جۇمىستارى باستالدى. جاپپاي ۆاكتسينالاۋ قازاقستاندا دا جۇرگىزىلىپ جاتىر. بۇل ءبىر جىل ىشىندە يممۋندىق قاباتتى جاسايدى. وسىلايشا، بۇل ىندەتتىڭ ۋشىعۋىن تەجەيدى. كوروناۆيرۋس ينفەكسياسى جويىلىپ، ماۋسىمدىق ۆيرۋستىق اۋرۋلار ساناتىنا ەنەدى دەپ ويلايمىز. سونىمەن قاتار حالىقتى COVID-19-عا قارسى جىل سايىنعى يممۋنداۋ قاجەت»، - دەدى اسەل قالىقوۆا.