قازىرگى ۇلتتىق كينوداعى جەتىستىكتەردى «تاۋ تولعاتىپ، تىشقان تۋدى» دەۋگە بولادى - ەسەتجان قوسۋبايەۆ
وسىعان وراي «ۇلتتىق كينونى قولداۋ مەملەكەتتىك ورتالىعى» ك ە ا ق باسقارما ءتوراعاسى ەسەتجان قوسۋبايەۆ پىكىر ءبىلدىردى، دەپ حابارلايدى قازاقپارات ءتىلشىسى.
«ۇلتتىق كينونى قولداۋ مەملەكەتتىك ورتالىعى» ك ە ا ق باسقارما ءتوراعاسى ەسەتجان قوسۋبايەۆ وتاندىق كينويندۋستريانى دامىتۋعا قاتىستى ماڭىزدى ماسەلەلەردى قوزعادى. ونىڭ ايتۋىنشا، ءبىز - الەمدىك قۇرىلىمنىڭ تۇبەگەيلى وزگەرۋىنىڭ، الەمنىڭ كوپتەگەن مەملەكەتتەرىنىڭ قوعامدىق- ساياسي قالىپتاسۋىنىڭ تەك كۋاگەرى عانا ەمەس، تىكەلەي قاتىسۋشىسىمىز.
«تاريحي جانە ماڭىزدى وقيعالارعا تولى ءداۋىر تەز ءوتىپ بارادى، ولار، شىعارماشىلىق تىلمەن ايتقاندا، دەكوراتسيالار، ناتۋرالىق لوكاتسيالار مەن اكتەرلەرى ديناميكالىق تۇردە اۋىساتىن جاھاندىق سپەكتاكل نەمەسە اسەرلى بلوكباستەر ىسپەتتەس. بۇل رەتتە تەك پاسسيونارلىق كەزەڭدەردى عانا ەمەس، سونىمەن بىرگە كەلەسىدەي تاريحتاعى درامالىق ساتتەردى دە تەرەڭ جانە كاسىبي تۇردە كورسەتەتىن ادەبي، كوركەم، بەينەلەۋ تۋىندىلارىنىڭ، تەاتر جانە ساحنالىق قويىلىمداردىڭ شىعارىلۋى وزەكتى ەكەنى ءسوزسىز»، - دەيدى ول.
سونىمەن قاتار، ول بۇگىنگى قازاقستاننىڭ تاريحى ماڭىزدى جاھاندىق وقيعالارعا تولى ەكەنىن اتاپ ءوتتى.
«اتالعان تاريحتىڭ نەگىزگى كەزەڭدەرى رۋحاني جانە الەۋمەتتىك- مادەني سالاداعى ماتەريالدىق جانە ماتەريالدىق ەمەس اكتيۆتەردە ورىن الۋعا تولىق قۇقىلى. مۇندا، ارينە، مادەني- يندۋستريالىق ءونىم رەتىندەگى امبەباپتىعىن ەسكەرە وتىرىپ، كينونىڭ ءرولى مەن مۇمكىندىكتەرىنە كۇمان كەلتىرۋگە بولمايدى»، - دەيدى ەسەتجان قوسۋبايەۆ.
ونىڭ سوزىنشە، وتاندىق كينو سالاسى 2001 -جىلدان 2020 -جىلعا دەيىن ەل بيۋدجەتىمەن شامامەن 70 ميلليارد تەڭگە كولەمىندە قارجىلاندىرىلعان.
«ارينە، حالىقارالىق كينوفەستيۆالدەردە ۇلكەن جەتىستىكتەرگە جەتىپ، ەڭ بەدەلدى حالىقارالىق كينوسىيلىقتاردىڭ قىسقا تىزىمىنە ەنگەن ءساتتى ناتيجەلەر بولعانى ءسوزسىز، دەگەنمەن، ەگەر ءبىز بۇل جەتىستىكتەردى مەملەكەتتىڭ، دالىرەك ايتساق، سالىق تولەۋشىلەردىڭ، حالىقتىڭ قالتاسىنان بولىنگەن قولداۋمەن سالىستىراتىن بولساق، وندا «تاۋ تولعاتىپ، تىشقان تۋدى» دەۋگە بولادى. بۇگىندە مادەنيەت جانە سپورت مينيسترلىگىنىڭ، ۇ ك ق م و، «قازاق فيلم» كينوستۋدياسىنىڭ باستى مىندەتى - كورسەتىلگەن قامقورلىققا ناقتى جانە ناتيجەلى جاۋاپ بەرۋ. قازاقستان كينەماتوگرافى ءوزىنىڭ ءتۇرلى سەگمەنتتەرىمەن وسى ماڭىزدى سالادا ءجۇرىپ جاتقان بارلىق ۇدەرىستەردىڭ الەمدىك جۇيەسىندەگى ءوز ۇستانىمى مەن ورنىن انىقتاۋى كەرەك. حالىق اقشاسى ءۇشىن جاۋاپكەرشىلىكتى سەزىنبەستەن، بيۋدجەتتى تەك تۇتىنۋشىلىق تۇرعىدان قابىلداۋ - بۇل ءسوزدى ايتۋعا قورىقپايمىن، بارىپ تۇرعان ازعىندىق»، - دەيدى ول.
«ۇلتتىق كينونى قولداۋ مەملەكەتتىك ورتالىعى» ك ە ا ق باسقارما ءتوراعاسى كينو سالاسىنا قاتىستى ءوز ۇسىنىستارىن ايتتى.
«پرەزيدەنت اتاپ وتكەندەي، الەمدەگى ەڭ ءىرى كينو ءوندىرۋشى جانە ستريمينگتىك كومپانيالار ازياعا قىزىعۋشىلىق تانىتىپ وتىر. جاڭارتىلعان زاڭعا ءبىز كينوسەريال، كينوسپەكتاكل ۇعىمدارىن ەنگىزگىمىز كەلەدى. بۇگىندە ءدال وسى جانرلار كورەرمەن اراسىندا ۇلكەن سۇرانىسقا يە. ءبىزدىڭ كينو وندىرۋشىلەردى «ۇلتتىق» دەگەن مارتەبەگە ساي كونتەنتتى جاساۋعا باعىتتاۋىمىز كەرەك. بۇل تاريحي تاقىرىپتاعى فيلمدەر، قازاقستاننىڭ ۇلى قايراتكەرلەرى تۋرالى الەۋمەتتىك ماڭىزى بار، جاستارعا ارنالعان دەرەكتى تۋىندىلار، حالىقارالىق كينو نارىعىنا شىعاتىن بالالارعا ارنالعان انيماتسيالىق كارتينالار. ورتالىق «التىن وردا» اتتى ءىرى جوبانى ىسكە اسىرۋعا دايىندىقتى باستادى. ارينە، بۇل - كينو قايراتكەرلەرىنىڭ، مەملەكەتتىك قۇرىلىمداردىڭ، الەمدىك كينو ورتالىقتارىنىڭ سەرىكتەستەرىنىڭ ەكستەنسيۆتى ەمەس، ىرگەلى تاسىلدەمەلەرىن، ياعني حالىقارالىق كونسورتسيۋم قۇرۋدى تالاپ ەتەتىن ۇلكەن ءورشىل حابارلاندىرۋ. قازاقستان تاۋەلسىزدىگىنىڭ 30 جىلدىعى كينەماتوگرافتىڭ بارلىق جانرلارىندا ەڭ جوعارى يدەيالىق- كوركەمدىك دەڭگەيدە كورىنىس تابۋى ءتيىس»، - دەيدى سپيكەر.
ايتا كەتەيىك، كەشە قىرىمبەك كوشەربايەۆتىڭ توراعالىعىمەن قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ وتىرىسى ءوتتى.
اۆتور: الما مۇقانوۆا
