ساۋل «كانەلو» گولوۆكينمەن ءۇشىنشى رەت قاشان جۇدىرىقتاساتىنىن ايتتى
ول الداعى ۋاقىتتا ەكىنشى ورتا سالماققا كوتەرىلىپ، الداعى 12 ايدا بەس كەزدەسۋ وتكىزىپ، بارلىق بەلبەۋدى جەڭىپ الۋعا نيەتتى ەكەن، دەپ جازادى Vesti.kz ءتىلشىسى.
«كانەلونىڭ» الداعى جوسپارىنا ورتا سالماقتا ونەر كورسەتەتىن قازاقستاندىق بوكسشى گەننادي گولوۆكينمەن (41-1-1، 36 ك و) جەكپە-جەك وتكىزۋ ويدا جوق ەكەن. «قازىر مەنىڭ ماقساتىم باسقا. ونىمەن (گولوۆكينمەن) كەزدەسۋ ويدا جوق. بيىل ونىمەن جۇدىرىقتاسپايتىنىم انىق»، - دەدى مەكسيكالىق بوكسشى ESPN ارناسىنا بەرگەن سۇقباتىندا.
ايتا كەتەيىك، ەكىنشى ورتا سالماقتا WBC جانە WBA Super بەلبەۋلەرىنىڭ يەگەرى اقپان ايىندا ءوزىنىڭ مىندەتتى قارسىلاسى تۇركيالىق اۆني يلدىرىمعا (21-2، 12 ك و) قارسى كەزدەسۋ وتكىزەدى. سوسىن ول مامىر ايىندا وسى سالماقتا WBO يەگەرى بريتاندىق بيللي دجو سوندەرسكە (30-0، 14 ك و) قارسى جەكپە-جەككە شىعادى. سونىمەن قاتار مەكسيكالىق بوكسشىنىڭ جوسپارىندا IBF بەلبەۋىنىڭ يەگەرى امەريكالىق كالەب پلانتپەن (21-0، 12 ك و) كەزدەسۋ وتكىزۋ دە بار.
«مەنىڭ باستى ماقساتىم - ەكىنشى ورتا سالماقتا بارلىق بەلبەۋدى جەڭىپ الۋ. كەلەسى قارسىلاستارىمنىڭ بارلىعى چەمپيون. مەن سولاردى جەڭۋگە نيەتتىمىن»، - دەدى «كانەلو».
ساۋل الۆارەستىڭ ايتۋىنشا، ول 2021-جىلى ءتورت كەزدەسۋ وتكىزەدى ەكەن. ءتىپتى كەزدەسۋلەردىڭ قاشان وتەتىنى دە بەلگىلى. ول اقپان، مامىر، قىركۇيەك جانە جەلتوقسان ايلارىندا شارشى الاڭعا شىعادى.
ەسكە سالايىق، گولوۆكين مەن «كانەلو» بۇعان دەيىن ەكى رەت كەزدەستى. 2017-جىلى وتكەن ايقاس تەڭ اياقتالسا، ءبىر جىلدان كەيىن مەكسيكالىق بوكسشى جەڭىسكە جەتتى.
