ەر ەدىگە ەپوسى تۇرىك تىلىندە جارىققا شىقتى
اقتوبە جەرىندە دە تۇركى الەمىنىڭ فەستيۆالىن وتكىزۋدى جوسپارلاعان.
بۇل تۋرالى س. بايىشيەۆ اتىنداعى اقتوبە ۋنيۆەرسيتەتىنىڭ پرورەكتورى، «رۋحاني جاڭعىرۋ» ورتالىعىنىڭ ديرەكتورى مۇحتار ميروۆ ايتتى، دەپ حابارلايدى قازاقپارات ءتىلشىسى.
قوعامدىق سانانى جاڭعىرتۋ باعدارلاماسىن ىسكە اسىرۋدىڭ ارنايى جول كارتاسى ۇسىنىلدى. بۇل ۇسىنىستىڭ ءمان-ماعىناسىنا زەر سالعان اقتوبەلىك عالىمدار دا ءوز ويىن ايتىپ، وڭىردە اتقارىلىپ جاتقان اۋقىمدى ءىستىڭ نەگىزگى بولىگىنە توقتالدى.
«كيەلى قازاقستان» ارنايى جوباسى نەگىزىندە ۇلتتىق تۋريزمدى دامىتۋ دۇرىس ءىس. شىن مانىندە قازاقستاننىڭ ءار تۇكپىرى كيەلى. 360 اۋليە مەكەن ەتكەن ماڭعىستاۋ جەرىن مىسالعا الۋعا بولادى.
ءار توبە، ءار قىراتى، ءار سايىندا تاريح بار. اقتوبە وڭىرىندە دە كيەلى مەكەن كوپ. كيەلى جەرلەردى زەرتتەۋ كەزىندە ساقتاعان بايىشيەۆ اتىنداعى اقتوبە ۋنيۆەرسيتەتى، «رۋحاني جاڭعىرۋ» ينستيتۋتى ارنايى جوبانى باستادى.
«اقتوبە وبلىسىنىڭ تاريحي تۇلعالارىنا تاعزىم» تاقىرىبىندا عىلىمي ەكسپەديتسيا ۇيىمداستىرىلدى. ماقسات - كيەلى جەرلەرگە ءتاۋ ەتىپ، ۇلتتىق رۋحاني سانانى جاڭعىرتۋ. بارلىعى 24 تاريحي تۇلعاعا جول كارتاسى ۇسىنىلدى. وبلىس اكىمى، تەلەارنا جانە س. بايىشيەۆ اتىنداعى اقتوبە ۋنيۆەرسيتەتى قولدادى. ىندەت كەزىندە جۇمىس توقتاعانىمەن، مۇنىڭ ماڭىزى زور ەكەنىن تۇسىندىك. ەكسپەديتسيا كەزىندە زەرتتەۋ جۇرگىزىلىپ، تىڭ مالىمەتتەر جينالادى. ەندى ونى جاستارعا ۇسىنۋ، تانىتۋ ماڭىزدى. وسى ارقىلى ىشكى تۋريزم ءوز بەتىمەن داميدى دەپ ەسەپتەيمىز»، - دەدى مۇحتار ميروۆ.
س. بايىشيەۆ اتىنداعى اقتوبە ۋنيۆەرسيتەتىنىڭ پرورەكتورى، «رۋحاني جاڭعىرۋ» ورتالىعىنىڭ ديرەكتورى ەر ەدىگە باتىردى زەرتتەۋ، تىڭ دەرەكتەردى جيناۋ، الەم عالىمدارىنىڭ وي-پىكىرىن ءبىر ارناعا توعىستىرۋ جۇمىسى ءوز ناتيجەسىن بەرگەنىن ايتتى.
«التىن وردانى 17 جىل بيلەگەن، ەلدىڭ جادىندا «ەل قامىن جەگەن ەر ەدى» دەگەن اتاۋمەن تاريحتا قالعان ەر ەدىگە باتىردىڭ ماڭگىلىك قونىس تاپقان مەكەنى اقتوبە وبلىسى، بايعانين اۋدانىنداعى ساعىز وزەنى بويىنداعى ەدىگە جالى توبەسى. وسى باعىتتا ءبىز ارنايى زەرتتەۋ جۇمىسىن جۇرگىزىپ جاتىرمىز. ەدىگە تانۋشى عالىم، فيلولوگيا عىلىمدارىنىڭ دوكتورى جۇمانازار اسان كوپ زەرتتەدى. سول جەر قورشالىپ، زاڭدى تۇردە زەرتتەۋ ءۇشىن جالعا الىندى. دەرەكتى فيلم دايىندالدى. تەك قازاقستان ەمەس، تۇركيا، ازەربايجان، داعىستان، يران، پاكىستان سەكىلدى بىرنەشە ەل عالىمدارى قاتىسقان حالىقارالىق سيمپوزيۋمدا فيلم كورسەتىلىپ، فيلوسوفيا عىلىمدارىنىڭ دوكتورى، پروفەسسور بەكەجان اقان ۇلى ەر ەدىگەنىڭ ءومىرى مەن ەرلىگى تۋرالى اعىلشىن تىلىندە بايانداما جاسادى. وتكەن جىلى شوقان ءۋاليحانوۆ زەرتتەۋىندەگى نۇسقاسى، ەر ەدىگە ەپوسى تۇرىك تىلىندە جارىققا شىقتى»، - دەدى ول.
مۇحتار ميروۆتىڭ ايتۋىنشا، بيىل قىركۇيەك ايىندا تۇركى الەمىنىڭ فەستيۆالىن اقتوبە جەرىندە وتكىزۋ جوسپارلانعان.
