فۋتبولدان كلۋبتار اراسىنداعى الەم چەمپيوناتىندا «باۆاريا» جەڭىمپاز اتاندى

نۇر-سۇلتان. قازاقپارات - كاتار ەلىندە فۋتبولدان كلۋبتار اراسىنداعى الەم چەمپيوناتىنىڭ جەڭىمپازى انىقتالدى، دەپ حابارلايدى قازاقپارات ءتىلشىسى.

بۇگىن فينالدا گەرمانيانىڭ «باۆاريا» جانە مەكسيكانىڭ «ۋانل تيگرەس» كوماندالارى كەزدەستى. ويىن بارىسى تارتىستى ءوربىدى. نەمىس فۋتبولشىلارى تىزگىندى ءوز قولىندا ۇستاۋعا تىرىستى.

ءبىرىنشى كەزەڭدە كوماندالار ءبىر-ءبىرىنىڭ قاقپاسىنان ساڭىلاۋ تابا العان جوق. ەكىنشى كەزەڭنىڭ 59-مينۋتىندا «باۆاريا» ويىنشىسى بەنجامەن پاۆار اشىق قالعان قاقپاعا دوپتى تۋرا باعىتتادى.

كەزدەسۋدە نەمىس كلۋبى 1:0 ەسەبىمەن باسىم ءتۇستى.

«باۆاريا» بۇدان بۇرىن مۇنداي جەتىستىككە 2013-جىلى قول جەتكىزدى. ول جولى فينالدا ماروككونىڭ «رادجا» كومانداسىن 2:0 ەسەبىمەن تىزە بۇكتىرگەن ەدى. ءۇشىنشى ورىن ءۇشىن سايىستا ەگيپەتتىڭ «ال احلي» جانە برازيليانىڭ «پالمەيراس» كوماندالارى نەگىزگى جانە قوسىمشا كەزەڭدە 0:0 ەسەبىمەن تەڭ اياقتالدى.

پەنالتيدە ەگيپەتتىك فۋتبولشىلار 3:2 ەسەبىمەن باسىم ءتۇستى. اتالعان دوپ دوداسى 2000-جىلدان بەرى تۇراقتى تۇردە وتكىزىلىپ كەلەدى. بۇگىنگى كۇنگە دەيىن 16 مارتە ۇيىمداستىرىلدى.

چەمپيوندىق اتاققا يسپانيانىڭ «رەال مادريد» 4، «بارسەلونا» 3، برازيليانىڭ «كورينتيانس» 2، «ينتەرناسونال»، «سان-پاۋلۋ»، انگليانىڭ «ليۆەرپۋل»، «مانچەستەر يۋنايتەد»، يتاليانىڭ «ميلان» «ينتەر» جانە گەرمانيانىڭ «باۆاريا» كوماندالارى يە بولدى.

2019 -جىلى «ليۆەرپۋل» كومانداسى جەڭىمپاز اتانعان بولاتىن. وتكەن جىلى دوپ دوداسى كوروناۆيرۋس ينفەكتسياسىنا بايلانىستى وتكىزىلمەي، بيىلعا اۋىستىرىلعان بولاتىن. 2021-جىلعى كلۋبتار اراسىنداعى الەم چەمپيوناتى جاپونيادا جەلتوقسان ايىندا وتكىزىلەدى دەپ جوسپارلانعان.