الماتىدا جوق پاتەرلەردى «جالعا بەرۋمەن» اينالىسقان الاياق ايەل ۇستالدى
الماتى قالالىق پوليتسيا دەپارتامەنتىنىڭ مالىمەتىنشە، قازىرگى تاڭدا ينتەرنەت- الاياقتىقپەن اينالىسىپ، جابىرلەنۋشىلەرگە جارتى ميلليون تەڭگەگە جۋىق شىعىن كەلتىرگەن ايەلدىڭ 11 فاكتىسى دالەلدەندى. پوليتسيا قىزمەتكەرلەرى ينتەرنەت كەڭىستىكتە ءوزىنىڭ ارام پيعىلىن جۇزەگە اسىرعان 36 جاستاعى ايەلدى ۇستادى. قالا اۋماعىندا بىرنەشە كۇننەن بەرى ينتەرنەت- تەحنولوگيالاردى قولدانۋ ارقىلى جاسالعان قىلمىستار مەن قۇقىق بۇزۋشىلىقتاردىڭ الدىن الۋ ماقساتىندا «Anti-Fraund» كەڭ كولەمدى ءىس- شاراسى جۇرگىزىلۋدە. الايدا، وڭاي جولمەن پايدا تاپقىسى كەلەتىندەردىڭ قۇرىعىنا اڭعال ازاماتتار ءالى دە تۇسۋدە، سونىڭ سالدارىنان ولار ۇلكەن كولەمدەگى قاراجاتىنان ايىرىلۋدا. وسىلايشا، 1984 -جىلى تۋعان ازاماتشا ينتەرنەت جەلىسىندە قالا اۋماعىندا جوق پاتەرلەردى ارزان باعامەن جالعا بەرۋ تۋرالى جارناما بەرىپ، جابىرلەنۋشىلەردەن ەلەكتروندىق تولەم جۇيەسى ارقىلى الدىن الا تولەم الىپ، ودان ءارى ۇيالى تەلەفونىن ءسوندىرىپ تاستاعان.
«ول الاياقتىق جولمەن تاپقان پايداسىن ءوزىنىڭ جەكە باسىنىڭ مۇقتاجدىعىنا جۇمساعان. بۇعان دەيىن، ول وسىعان ۇقساس قىلمىس جاساعانى ءۇشىن 2015 -جىلى سوتتى بولعان. الايدا، ول بوستاندىققا شىققاننان كەيىن ءوزىنىڭ ەسكى ادەتىنە قايتا باسقان»، - دەيدى المالى اۋداندىق پوليتسيا باسقارماسىنىڭ باستىعى ەسەن ىسقاقوۆ.
بۇگىنگى كۇنى كۇدىكتىنىڭ 11 الاياقتىق فاكتىسى انىقتالىپ، دالەلدەندى. جابىرلەنۋشىلەرگە كەلتىرىلگەن شىعىننىڭ جالپى سوماسى - 491 مىڭ تەڭگە. كۇدىكتىگە قاتىستى ق ر ق ك 190-بابىنىڭ 3-بولىگى بويىنشا ءىس قوزعالدى. سونىمەن قاتار، وسى ايەلدىڭ قاتىسۋىمەن جاسالعان الاياقتىقتىڭ باسقا دا ەپيزودتارىن انىقتاۋ جۇمىسى جۇرگىزىلۋدە.
