18:26, 11 - اقپان 2021 | GMT +5
جوعارعى سوتتىڭ سۋدياسى ءىرى كولەمدە پارامەن ۇستالدى
نۇر- سۇلتان. قازاقپارات – ق ر سىبايلاس جەمقورلىققا قارسى ءىس- قيمىل اگەنتتىگى مەن ق ر جوعارعى سوتىنىڭ ىشكى قاۋىپسىزدىك قىزمەتى بەلگىلى ءبىر ۋاقىت ىشىندە بىرلەسكەن ءىس- شارالار جۇرگىزدى، دەپ حابارلايدى قازاقپارات.
جوعارعى سوت باسپا ءسوز قىزمەتىنىڭ مالىمەتىنشە، اتالمىش شارا ناتيجەسىندە 11- اقپاندا نۇر- سۇلتان قالاسىندا ءىرى كولەمدەگى اقشانى الۋ كەزىندە جوعارعى سوتتىڭ سۋدياسى ۇستالعان.
«قاراجات ونىڭ جوعارى سوت كەڭەسىندە جۇمىس ىستەگەن كەزىندە تۇركىستان وبلىسى اۋداندىق سوتىنىڭ سۋدياسىن باسقا سوتقا اۋىستىرۋعا جاردەم كورسەتكەنى ءۇشىن بەرىلگەن. وسى ۋاقىتتا تۇركىستان قالاسىندا اقشانى بەرىپ جىبەرگەن اۋداندىق سوتتىڭ سۋدياسى ۇستالدى»، دەلىنگەن حابارلامادا.
باسپاءسوز قىزمەتىنىڭ حابارلاۋىنشا، تەرگەۋ امالدارىنىڭ جۇرگىزىلۋىنە بايلانىستى باسقا اقپارات جاريالانبايدى.
اۆتور: اياۋلىم التىنبەك
