باسپانا نارىعى: باعانىڭ تومەندەۋىن كۇتۋ كەرەك پە

نۇر- سۇلتان. قازاقپارات - قازاقستاندا جىلجىمايتىن مۇلىك باعاسى كۇرت قىمباتتادى. كوپتەگەن ساراپشىلار مۇنى زەينەتاقى جيناقتارىن مەرزىمىنەن بۇرىن الۋدان تۋىنداعان دۇرلىگۋمەن بايلانىستىرادى.

وسى ورايدا قازاقستاننىڭ بىرىككەن ريەلتورلار قاۋىمداستىعى پرەزيدەنتىنىڭ كەڭەسشىسى نينا لۋكيانەنكو وتاندىق تۇرعىن ءۇي نارىعىنداعى احۋال مەن كەلەشەگى تۋرالى پىكىرىمەن ءبولىستى، دەپ حابارلايدى قازاقپارات ءتىلشىسى.

ونىڭ ايتۋىنشا، قاڭتار ايىندا جاڭا باسپاعا باعاسى % 3- عا، ال جابدىقتالعان باسپانانى قايتا ساتۋ كەزىندە % 5- عا كوتەرىلگەن.

«الايدا، زەينەتاقى قاراجاتىن پايدالانۋ ەرەجەلەرى تەك قاڭتار ايىنىڭ سوڭىندا پايدا بولعاندىقتان، بۇل اقشاعا باسپانا ساتىپ الۋ مۇمكىندىگى قاڭتارداعى مامىلەلەرگە ىقپال ەتكەن جوق»، - دەدى نينا لۋكيانەنكو.

قازىرگى ۋاقىتتا ساتۋشىلار ۇيگە سۇرانىس كوبەيگەندىكتەن باعانى قىمباتتاتىپ جاتقانى بايقالادى. «بۇل نارىققا دا، ەكى جاققا دا جاقسى اسەر ەتە قويمايدى. ەندى ءارى قاراي ارزانداۋ تۋرالى ايتار بولساق، بۇل كليەنتتەردىڭ ارەكەتىنە بايلانىستى بولادى. ەگەر ساتىپ الۋ تۋرالى شەشىم ساتۋشىلاردىڭ جاڭا «تابەتى» بويىنشا قابىلدانسا، وندا جاقىن ارادا ارزاندامايدى. ال ەگەر ساتىپ الۋشىلاردىڭ شەشىمدەرى «باعا- ساپا» قاتىناسىنا سايكەس كەلسە، ەرتەلى- كەش نارىق تەپە- تەڭدىك كۇيىنە كەلەدى. ارينە، جىل سوڭىنا دەيىن، تولەم قابىلەتى راستالعان سۇرانىستىڭ ارتۋىنان مامىلەلەردەگى باعالار ءالى دە جوعارىلاۋى مۇمكىن»، - دەيدى نينا لۋكيانەنكو.

جىلجىمايتىن مۇلىك الۋدى جوسپارلاپ جۇرگەندەرگە ساراپشى تاڭداۋ جاساۋعا اسىقپاۋعا كەڭەس بەرەدى.

«اسىعۋ ەشقاشان جاقسى كەڭەسشى بولعان ەمەس، ساتىپ الۋ ماقساتىن، پاتەردىڭ نە ءۇشىن قاجەت ەكەنىن جانە نەلىكتەن قازىر الۋ كەرەكتىگىن انىقتاۋ كەرەك. شەشىم قابىلداۋعا اسىقپاڭىز، ساتۋشىمەن ساۋدالاسىڭىز»، - دەپ اتاپ ءوتتى نينا لۋكيانەنكو.

سونىمەن بىرگە، سپيكەر باسپانا سالۋشىلاردىڭ باعا كوتەرۋدەگى الىپساتارلىعى تۋرالى ايتتى. «جوق، باعانىڭ ءوسۋى الىپساتارلىق ەمەس، ساتىپ الۋ قابىلەتى دە ۇلعايدى. ءتىپتى پاتەر الۋعا قارجىسى جەتپەگەندەر دە قاراجات قوسىپ، يپوتەكا ارقىلى الىپ جاتادى. قازىر ساتىپ الۋشىلاردان الۋان ءتۇرلى سومالارمەن وتىنىشتەر كورىپ وتىرمىز، ب ج ز ق- دان تەك 2 ميلليون قاراجاتى بارلارمەن دە مامىلە بەكىتەمىز. 15 ميلليون جانە ودان جوعارى سوماعا دا كوپتەگەن وتىنىشتەر بار، 40 ميلليوننان باستالاتىن دا وتىنىشتەر بار»، - دەپ ءتۇسىندىردى ن. لۋكيانەنكو.

جالپى، كەيبىر ساراپشىلاردىڭ باعالاۋىنشا، قازاقستاندا پاتەر قۇنى ءبىر جىلدا 13 پايىزعا ءوستى. جىلجىمايتىن مۇلىك باعاسى زەينەتاقى جيناعىنان قارجى الۋ باعدارلاماسىنا بايلانىستى قىمباتتاعان. بۇگىندە قايتالاما نارىقتاعى شارشى مەتردىڭ باعاسى رەكوردتىق 230 مىڭ تەڭگەدەن استى.

ۇلەستىك قۇرىلىسقا دا باعا كوتەرىلدى، مىسالى، سەنىمدىلىگى جاعىنان ءوزىن كورسەتە بىلگەن كومپانيالاردىڭ نۇر- سۇلتانداعى قۇرىلىسى باستالعان ت ك باعاسى - شارشى مەترىنە 346 مىڭ تەڭگە، ياعني اۋدانى 85 شارشى مەتردەن اساتىن كومفورت كلاستى ءۇش بولمەلى پاتەر 29 ميلليون تەڭگەدەن اسادى. ال وتكەن جىلى ۇلەستىك قاتىسۋ پاتەرىنىڭ باعاسى 24-25 ميلليون تەڭگە بولعان ەدى. اسا تانىمال ەمەس كومپانيالاردا وسىنداي تۇرعىن ءۇيدىڭ شارشى مەترى 280 مىڭ تەڭگەدەن ۇسىنىلىپ وتىر. ءبىراق مۇندا تاۋەكەل ىقتيمالدىعى جوعارى.

الايدا ساراپشىلار جاپپاي ساتىپ الۋلار بولمايدى دەپ بولجاپ وتىر. ەكونوميستەردىڭ ايتۋىنشا، جيناقتاعى ارتىق قاراجاتقا قازاقستاندىقتاردىڭ تەك % 6- ى نەمەسە 700 مىڭنان استام ادام قول جەتكىزە الادى.

ەسكە سالا كەتسەك، بۇعان دەيىن مەملەكەت باسشىسى قاسىم- جومارت توقايەۆ باسپانا باعاسىنىڭ شارىقتاۋىنا توسقاۋىل قويۋدى تاپسىرعان ەدى.

اۆتور: ايجان سەرىكجان قىزى