الماتى وبلىسىنان تابىلعان ارىستاننىڭ قازىرگى جاعدايى بەلگىلى بولدى

الماتى. قازاقپارات - الماتى وبلىسىنداعى شارۋا قوجالىقتاردىڭ بىرىنەن تابىلعان ارىستان الماتى قالالىق زووباعىنا جەتكىزىلدى. وعان دجۋما دەگەن ات قويىلدى.

بۇل تۋرالى ەكولوگيا، گەولوگيا جانە تابيعي رەسۋرستار مينيسترلىگى ءمالىم ەتتى، دەپ حابارلايدى قازاقپارات ءتىلشىسى.

ەكولوگيا مينيسترلىگىنىڭ باسپا ءسوز حاتشىسى سامال يبرايەۆانىڭ ايتۋىنشا، ارىستاندى الماتى زووباعىنا بەرۋ ماسەلەسى، بەلسەندى ازاماتتاردىڭ ارقاسىندا شەشىلدى.

«ارينە، جابايى جانۋارلاردىڭ ورنى تابيعاتتا. ءبىز ولاردىڭ حايۋاناتتار باعىندا بولۋىن قۇپتامايمىز، ءبىراق ءدال وسى جاعدايدا باسقا امال جوق. الماتى زووباعى ارىستاندى قابىلدادى. شارۋا قوجالىقتان تابىلعان ارىستان سيمبانىڭ قاۋمالىنا ورنالاستىرىلدى. ول ءۇشىن حالىقارالىق قار بارىسى قورىنا (Snow Leopard Foundation) العىس ايتامىز.

ارينە، ارىستاننىڭ ءوزىنىڭ قورشاۋى مەن تاماعى بولۋ كەرەك. ول ايتارلىقتاي قارجىنى تالاپ ەتەدى. وسى ورايدا كومەك قولىن سوزعان سانجار بوقايەۆ پەن رۋسلان جەمكوۆكە راحمەت ايتامىن. بۇل ازاماتتار ارىستاننىڭ تاماعىنا كراۋدفاندينگ ارقىلى قاراجات جيناۋ شاراسىن ۇيىمداستىردى. ارىستاندى تاماقتاندىرۋ ءۇشىن كۇنىنە 10-15 كەلى ەت قاجەت. بۇل قاراجات زووباعى جانۋاردى ءوز بالانسىنا قابىلداعانعا دەيىن قاجەت بولادى، بۇل كەم دەگەندە 3-4 ايعا سوزىلادى»، - دەدى سامال يبرايەۆا.

ونىڭ ايتۋىنشا، الماتىداعى جانۋارلاردى قورعاۋ قورىنىڭ مۇشەسى ناتاليا سۋلجيك ارىستاندى قۇتقارۋعا بارىن سالعان. ول سانجار بوقايەۆپەن بىرگە الماتى زووباعىنىڭ اكىمشىلىگىمەن شۇعىل تۇردە كەلىسسوزدەر جۇرگىزىپ، ورنالاستىرۋ ماسەلەسىن شەشتى. ءوز كەزەگىندە ناتاليا سۋلجيك Facebook-تەگى پاراقشاسىنا زووباقتا تۇسىرىلگەن ۆيدەونى سالدى.

«ارىستاننىڭ اتى - دجۋما. الماتى زووباعى ارىستاندى قابىلدادى. الايدا، ءبىر شارت قويدى. الداعى ۋاقىتتا وعان سيمبانىكى سياقتى قورشاۋ سالىپ بەرۋ قاجەت. ازىرگە بىزگە ەسكى جازعى قورشاۋدى قالپىنا كەلتىرۋدى ۇسىندى. كەلەسى جىلدىڭ قىسىنا دەيىن جاڭا قورشاۋ قاجەت بولادى»، - دەپ جازادى ناتاليا.

ەسكە سالا كەتسەك، بۇعان دەيىن الماتى وبلىسىندا شارۋا قوجالىعى يەسىنىڭ ارىستان اسىراپ جاتقانى انىقتالعان بولاتىن. الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 8-اقپان كۇنى تالعار اۋدانىنىڭ پوليتسيا باسقارماسىنا حابارلاما كەلىپ تۇسكەن. ول جەردە بەسقاينار اۋدانىنداعى شارۋا قوجالىقتىڭ بىرىندە ارىستان بار ەكەنى حابارلانعان. ءتارتىپ ساقشىلارى شاعىم بويىنشا بەلگىلەنگەن مەكەنجايدى تەكسەرۋگە بارعاندا اقپارات راستالعان.

اۆتور: الما مۇقانوۆا