الماتى اۋەجايىندا سانيتارلىق نورمالار قالاي باقىلانادى
الماتى قالاسى اكىمىنىڭ تاپسىرماسى بويىنشا مەگاپوليس اۋماعىنداعى قوعامدىق ورىنداردا سانيتارلىق- ەپيدەميولوگيالىق تالاپتاردىڭ ساقتالۋى كۇن سايىن باقىلانىپ وتىر. ولاردىڭ قاتارىندا الماتى حالىقارالىق اۋەجايى دا بار. مەگاپوليس اۋەجايىندا جولاۋشىلار مەن قىزمەتكەرلەردىڭ قاۋىپسىزدىگىن قامتاماسىز ەتۋ ءۇشىن كەشەندى الدىن الۋ شارالارى جۇزەگە اسىرىلدى.
تەرمينالعا كىرگەن كەزدە دەنە تەمپەراتۋراسىن مىندەتتى تۇردە ولشەۋ جۇرگىزىلەدى. اۋەجاي قىزمەتكەرلەرى بەتپەردە رەجيمىن جانە الەۋمەتتىك قاشىقتىقتى قاتاڭ باقىلايدى. قولدى وڭدەۋگە ارنالعان سانيتايزەرلەر ورناتىلعان. ءاربىر رەيستەن كەيىن عيماراتتار مەن پەرروندىق اۆتوبۋستارعا كۇشەيتىلگەن دەزينفەكسيا جۇرگىزىلەدى. كەلۋشىلەردى حاباردار ەتۋ ماقساتىندا ادامدار كوپ جينالاتىن جەرلەردە الەۋمەتتىك قاشىقتىق بەلگىلەرى كورسەتىلگەن، كۇتۋ زالىنداعى ورىدىقتار شاحماتتىق تارتىپپەن بەلگىلەنگەن.
اۋەجايدا سانيتارلىق نورمالاردىڭ ساقتالۋىن مونيتورينگىلىك توپتار باقىلايدى. ق ر سىبايلاس جەمقورلىققا قارسى ءىس- قيمىل اگەنتتىگى جانىنداعى رەسپۋبليكالىق ارنايى مونيتورينگ توپتىڭ جەتەكشىسى ايگۇل سولوۆيەۆا جانە قر سىبايلاس جەمقورلىققا قارسى قىزمەتى جانىنداعى رەسپۋبليكالىق ارنايى مونيتورينگ توپ ءتوراعاسىنىڭ ورىنباسارى رافاەل گاسانوۆ الماتى حالىقارالىق اۋەجايىندا سانيتارلىق- ەپيدەميولوگيالىق شارالاردىڭ ساقتالۋىنا كەزەكتى مونيتورينگ جۇرگىزدى.
«ءبىز الماتى اۋەجايى قولداناتىن بارلىق الگوريتمدى قاداعالادىق. ءبىرىنشى كەزەكتە، ماسكا رەجيمى مەن سانيتارلىق نورمالاردىڭ ساقتالۋىن تەكسەردىك»، - دەيدى ايگۇل سولوۆيەۆا.
سونىمەن قاتار، ول قالا تۇرعىندارى كوبىرەك جاۋاپكەرشىلىك تانىتىپ، سانالى تۇردە قازاقستان اۋماعىنا قايتىپ كەلگەنگە دەيىن الدىن الا پ ت ر تەستىلەۋدەن ءوتۋى ءتيىس ەكەنىن تىلگە تيەك ەتتى. ينسپەكسيالاۋ بارىسىندا مونيتورينگ توپ مۇشەلەرى حالىقارالىق اۆيارەيستەرگە كەلەتىن جولاۋشىلاردىڭ قوزعالىس مارشرۋتىمەن تانىستى.
ەستەرىڭىزگە سالا كەتەيىك، باس مەملەكەتتىك سانيتار دارىگەردىڭ قاۋلىسىنا سايكەس قازاقستانعا كەلگەندەردىڭ بارلىعىندا پ ت ر- كوروناۆيرۋستىڭ جوقتىعى تۋرالى انىقتاما بولۋى ءتيىس، ول بەرىلگەن كۇننەن باستاپ 3 تاۋلىكتەن اسپاۋى كەرەك. انىقتاما بولماعان جاعدايدا كەلگەن ق ر ازاماتتارى پ ت ر ادىسىمەن COVID-19 عا زەرتحانالىق تەكسەرۋ ءۇشىن كارانتيندىك ستاتسيونارعا 3 تاۋلىككە دەيىن وقشاۋلانۋعا جاتادى، ال شەتەلدىك ازاماتتار دەپورتاتسيالانادى.
«ءبىز الماتى قالاسى بويىنشا وسىنداي مونيتورينگتى تۇراقتى تۇردە جۇرگىزىپ وتىرامىز. ءبىز اۋەجايعا بارىپ، كوروناۆيرۋس ينفەكسيانىڭ تارالۋىنا جول بەرمەۋ ءۇشىن قالا باسشىلىعىمەن بىرلەسىپ ەنگىزىلگەن جاڭالىقتارمەن تانىستىق»، - دەدى رافاەل گاسانوۆ.
ايتا كەتەر بولساق، 9-اقپاندا الماتى اۋەجايىنا 1524 جولاۋشىسى بار 8 حالىقارالىق اۋە رەيسى كەلدى. ولاردىڭ ىشىندە 1303 جولاۋشىنىڭ انىقتاماسى بار، 221 ادامنىڭ انىقتاماسى بولماي شىقتى.
اۆتور: الما مۇقانوۆا
