سەناتور نۇرتورە ءجۇسىپ بالالار كارديوحيرۋرگتەرىنىڭ جەتىسپەۋشىلىگى ماسەلەسىن كوتەردى
دەپۋتاتتىڭ ايتۋىنشا، جۇرەك رەانيماتسياسى مەن قارقىندى تەراپيا بولىمىندەگى ناۋقاستاردا ءدارى- دارمەكتەر، اتاپ ايتقاندا قوسىمشا انتيبيوتيكتەر، يممۋندىق جانە باسقا دارىلەر، سونداي- اق قىمبات مرت اپپاراتتارى جەتىسپەيدى.
«قازىرگى ۋاقىتتا 7 قالاداعى كارديوحيرۋرگيالىق 10 ورتالىقتا بالالاردىڭ جۇرەك اقاۋىنا وپەراتسيا جاساۋ مۇمكىندىگى بار. 2020 -جىلى 18 جاسقا دەيىنگى بالالار اراسىندا اشىق جۇرەككە - 1627، ونىڭ ىشىندە 1 جاسقا دەيىنگى - 1128 بالاعا، 271 نارەستەگە وپەراتسيا جاسالعان. وپەراتسيا جاساۋ بارىسىندا حيرۋرگتەر كوپ جاعدايدا شۇعىل شەشىم قابىلدايدى. ال بۇل - ۇلكەن جاۋاپكەرشىلىك. جالاقىسى تومەن، جاۋاپكەرشىلىگى جوعارى بولعان سوڭ جاس كارديوحيرۋرگتەر بۇل ماماندىق بويىنشا تۇراقتاپ ىستەمەيدى»، - دەدى نۇرتورە ءجۇسىپ ۇكىمەت باسشىسىنىڭ اتىنا جولداعان دەپۋتاتتىق ساۋالىندا.
سەناتور ەلىمىزدە بالالار اريتمولوگتارى، بالالار كارديوحيرۋرگى، پەرفۋزيولوگ ماماندارىنىڭ جەتىسپەيتىنىن اتاپ ءوتتى. ول وسى ماماندىقتاردىڭ مارتەبەسىن، سونىمەن بىرگە جالاقىسىن كوتەرۋ قاجەت دەپ وتىر. دەپۋتاتتىڭ سوزىنە قاراعاندا، كەپىلدەندىرىلگەن مەديتسينالىق كومەك اياسىندا كورسەتىلەتىن قىزمەتتەرگە تاريفتىك ساياساتتى قايتا قاراۋ ماڭىزدى.
نۇرتورە ءجۇسىپ جەتىسپەي وتىرعان مەديتسينالىق كادرلاردى دايارلاۋ ماسەلەلەرىن جەدەل شەشۋ، حالىقارالىق ماستەر-كلاستار وتكىزۋ جانە وزىق ەلدەردىڭ تاجىريبەسىنەن ساباق الۋ قاجەت دەپ قوستى. ماتەريالدىق- تەحنيكالىق بازانى نىعايتۋ جانە كلينيكالاردى قامتاماسىز ەتۋ، لوگيستيكانى جاقسارتۋ جانە دياگنوستيكا مەن ەمدەۋدىڭ كلينيكالىق پراكتيكاسىنا زاماناۋي مەديتسينالىق تەحنولوگيالاردى ەنگىزۋدى جەدەلدەتۋ ماڭىزدى.
