ديپلوماتتارعا قويىلاتىن تالاپ كۇشەيتىلەدى - سەنات

نۇر- سۇلتان. قازاقپارات - پارلامەنت سەناتىنىڭ جالپى وتىرىسىندا «قازاقستان رەسپۋبليكاسىنىڭ ديپلوماتيالىق قىزمەتى تۋرالى» قازاقستان زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى.

قۇجاتقا تولىقتىرۋلار ەنگىزىلگەندىكتەن، زاڭ جوباسى ماجىلىسكە قايتارىلدى، دەپ حابارلايدى قازاقپارات ءتىلشىسى. زاڭ جوباسى 2002 -جىلى قابىلدانعان ق ر «ديپلوماتيالىق قىزمەتى تۋرالى» زاڭدى جەتىلدىرۋگە باعىتتالعان.

نورمالار مينيسترلىكتىڭ قۇزىرەتى مەن قۇرىلىمىن، ديپلوماتيا قىزمەتكەرلەرى مەن وسى سالا ارداگەرلەرىنىڭ الەۋەتىن، جۇمىس ىستەۋ جانە قارجىلاندىرۋ ءتارتىبىن قامتيدى.

«ءبىز ولاردى وزەكتى جانە قاجەتتى دەپ، باسىم كوپشىلىگىنە قولداۋ تانىتتىق. سونىمەن قاتار، زاڭ جوباسىن تالقىلاۋ بارىسىندا سەنات دەپۋتاتتارى تاراپىنان، ءماجىلىس ماقۇلداعان زاڭ جوباسىنا ءبىرقاتار ۇسىنىس پەن تۇزەتۋ ەنگىزىلدى. ولار، «ديپلوماتيالىق قىزمەت ارداگەرى» ۇعىمىن تاعايىنداۋ ءۇشىن ارنايى وكىلەتتى 15 تەن 10 جىلعا تومەندەتۋ جانە ول بويىنشا ارنايى تولەمدەردى 2022 -جىلعى 1-قاڭتاردان باستاۋ. بۇل ۇسىنىستى رەسپۋبليكالىق بيۋدجەت كوميسسياسى بيىلعى 25-قاڭتارىندا قولدادى. كەلەسى، «ديپلوماتيالىق پوشتانى» ديپلوماتيالىق قىزمەتكەرلەرمەن ولاردىڭ وتباسى مۇشەلەرىنىڭ جەكە مۇددەسى ءۇشىن قولدانۋ قۇقىعىن زاڭ جوباسىنان الىپ تاستاۋ»، - دەدى سەناتور قايرات قوجامجاروۆ.

ونىڭ ايتۋىنشا، 1961 -جىلعى «ديپلوماتيالىق قاتىناستار تۋرالى» ۆەنا كونۆەنسياسىنىڭ ەرەجەلەرىنە سايكەس، ديپلوماتيالىق پوشتادا ديپلوماتيالىق قۇجاتتار مەن رەسمي پايدالانۋعا ارنالعان زاتتار بولۋى قاجەت. اتالعان كونۆەنتسيانى قازاقستان رەسپۋبليكاسى 1993 -جىلى راتيفيكاتسيالانعان جانە نەگىزگى زاڭىمىز مۇنداي حالىقارالىق شارتتاردىڭ ۇلتتىق زاڭنامادان باسىمدىعىن تانيدى. «ديپلوماتيالىق پوشتاعا ارنالعان ۇقساس تالاپ ەلىمىزدىڭ كەدەندىك كودەكسىندە بار. وسىعان بايلانىستى، بۇل نورمانى زاڭ جوباسىنان الىپ تاستاۋ ۇسىنىلادى. ق ر پرەمەر-ءمينيسترىنىڭ بيىلعى 9-اقپانداعى قورىتىندىسىندا، سەنات دەپۋتتارىنىڭ بۇل تۇزەتۋلەرىنە وڭ باعا بەرىلدى»، - دەدى ق. قوجامجاروۆ.

اتاپ ايتقاندا، قۇجاتتا قازاقستاندىق ديپلوماتتارعا قىزمەتكە كىرۋ كەزىندە قويىلاتىن تالاپتار كۇشەيتىلەتىن بولدى. قۇجاتتا ولارعا مەملەكەتتىك تىلمەن قاتار شەت تىلدەرىن ءبىلۋى قاجەتتىگى كوزدەلىپ وتىر. قۇقىق بۇزۋشىلىق جاساعانى ءۇشىن ديپلوماتيا سالاسى قىزمەتكەرلەرىنىڭ ديپلوماتيالىق دارەجەسى تومەندەتىلەدى نەمەسە ودان ايىرۋ دا قارالادى. سەنات ءتوراعاسى ماۋلەن اشىمبايەۆ اتالعان زاڭ جوباسىنىڭ ەرەكشە ماڭىزىن اتاپ ءوتتى.

«قۇجات ەلىمىزدىڭ ديپلوماتيالىق قىزمەتىنىڭ قۇقىقتىق بازاسىن جەتىلدىرەدى جانە رەتتەيدى. جوبا سونداي- اق ديپلوماتيالىق سالا ارداگەرلەرىن الەۋمەتتىك قولداۋعا باعىتتالعان نورمالاردى دا قامتيدى. قابىلدانعان زاڭ ەلىمىزدىڭ ديپلوماتيالىق قىزمەتىنىڭ تيىمدىلىگىن ارتتىرۋعا ءوز ۇلەسىن قوسادى دەپ ۇمىتتەنەمىز»، - دەدى ماۋلەن اشىمبايەۆ.

دەپۋتاتتار زاڭ جوباسىن قاراۋ بارىسىندا وعان ءبىرقاتار تۇزەتۋ ەنگىزۋدى ۇسىندى. سەناتورلار، اتاپ ايتقاندا، «ديپلوماتيالىق قىزمەت ارداگەرى» ۇعىمىن تۇزەتۋدى جانە وسى ساناتقا جاتاتىن ادامدار توبىن قايتا قاراۋدى ۇسىندى. سونداي-اق ديپلوماتيالىق پوشتانى ەلشىلىكتەر قىزمەتكەرلەرى مەن ولاردىڭ وتباسى مۇشەلەرىنىڭ جەكە پايدالانۋىنا ارنالعان زاتتار مەن تەحنيكانى جىبەرۋگە پايدالانۋ قۇقىعىن الىپ تاستاۋدى سۇرادى. زاڭ جوباسى سەناتتىڭ وسى جانە باسقا دا تۇزەتۋلەرىمەن ماجىلىسكە قايتارىلدى.

اۆتور: رۋسلان عابباسوۆ