قازاقستاندا ۆاكتسينالاۋ جۇمىستارى قالاي ءجۇرىپ جاتىر؟

نۇر-سۇلتان. قازاقپارات - بۇگىن ورتالىق كوممۋنيكاتسيالار قىزمەتىندە دەنساۋلىق ساقتاۋ ءمينيسترى الەكسەي سوي مەن ق ر د س م سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا قازاقستانداعى ەپيدەميالىق جاعداي تۋرالى سۇراقتارعا جاۋاپ بەردى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسىمەن قازاقستان رەسپۋبليكاسىندا 2021-جىلى 1- اقپاندا رەسەيدە شىعارىلعان «گام- كوۆيد- ۆاك» (سپۋتنيك V) ۆاكتسيناسىمەن ك ۆ ي- گە قارسى ۆاكتسيناتسيالاۋ باستالدى. ۆاكتسيناتسيا بارلىق وڭىردە جۇرۋدە، 778 ەگۋ پۋنكتى اشىلدى، ولاردىڭ 166 سى قازىر ىسكە قوسىلدى، بارلىعى توڭازىتقىشپەن قامتاماسىز ەتىلگەن. 9 مىڭنان استام مەديتسينا قىزمەتكەرى وقىتىلدى»، - دەدى مينيستر.

10- اقپانداعى جاعداي بويىنشا 13301 ادامعا ەكپە ەگىلدى. ۆاكتسيناتسيانى ءبىرىنشى بولىپ ينفەكتسيالىق ستاتسيونار، جەدەل مەديتسينالىق كومەك، سونداي-اق ك ۆ ي- مەن سىرقاتتانۋدىڭ جوعارى قاۋپى بار باسقا دا بەيىندەگى مەديتسينا قىزمەتكەرلەرى الادى. ودان كەيىن قاتارعا پەداگوگ، كۇش قۇرىلىمدارىنىڭ قىزمەتكەرلەرى قوسىلادى. ۆاكتسيناتسيانىڭ قورعاۋ اسەرى ءبىرىنشى دوزادان سوڭ 12-14 كۇننەن كەيىن بايقالادى، ءبىراق تولىق يممۋنيتەت قالىپتاسۋ ءۇشىن ەكى دوزا قاجەت، ەكپەنى اراعا 21 كۇن سالىپ قايتالاۋ ۇسىنىلادى.

تولىق كۋرستان كەيىن 1,5 اي ىشىندە ورگانيزمدە يممۋندىق رەاكتسيا پايدا بولادى، وسىعان بايلانىستى ەگىلگەن ادامدار پروفيلاكتيكا شارالارىن ساقتاۋى قاجەت.

«ۆاكتسيناتسيالاۋ جوسپارى بىرنەشە رەت ايتىلدى. قازاقستاندا قاراعاندى فارماتسيەۆتيكالىق كەشەنى شىعاراتىن «سپۋتنيك V» ۆاكتسيناسىن جەتكىزۋ جانە پايدالانۋ جوسپارلانۋدا. قازىردىڭ وزىندە 90 مىڭ دوزا كولەمىندە ءبىرىنشى پارتيانىڭ ءوندىرىسى باستالدى، ول ءبىرىڭعاي ديستريبيۋتوردىڭ قويمالارىنا جانە ودان ءارى وڭىرلەرگە اقپان ايىنىڭ سوڭىنا قاراي جونەلتىلەدى. شىلدە ايىنا دەيىن ءوندىرىس كولەمى 2 ميلليون دوزاعا جەتەدى»، - دەدى مينيستر.

سونىمەن بىرگە، دەنساۋلىق ساقتاۋ ءمينيسترى الەكسەي سوي قازاقستاندا «سپۋتنيك V» ۆاكتسيناسىن ءوندىرۋ شەشىمىنىڭ نە ءۇشىن قابىلدانعانىن ايتىپ بەردى.

«بىرىنشىدەن، رەسەيلىك ۆاكتسينا - الەم بويىنشا تىركەلگەن العاشقى ۆاكتسينا. ونىڭ تىركەلگەن ەستىگەن كەزدە-اق كەلىسسوز جۇرگىزۋدى باستادىق. وزدەرىڭىز بىلەسىزدەر، قازاقستان مەن رەسەي مەملەكەت باسشىلارى دەڭگەيىندە وسى ۆاكتسينانى ق ر اۋماعىنا جەتكىزۋ جانە كومەك كورسەتۋ تۋرالى ۋاعدالاستىق ورناتتى. رەسەي فەدەراتسياسى تاراپىنان تەحنولوگيالار ترانسفەرتىنە، ۆاكتسينالار وندىرۋگە جانە رەسەيدەن تىس جەرلەردە ساتۋعا ايرىقشا قۇقىعى بار رەسەيلىك تىكەلەي ينۆەستيتسيالار قورى بار. وسى قورمەن كەلىسسوزدەر جۇرگىزدىك جانە ىنتىماقتاستىق تۋرالى مەموراندۋمعا قول قويدىق. قازاقستاندا ۆاكتسينالار ءوندىرىسى باعدارلاماسىن جۇزەگە اسىرۋدا سەرىكتەس بولۋى مۇمكىن قازاقستاندىق كاسىپورىنداردىڭ ءتىزىمىن ۇسىندىق»، - دەپ جاۋاپ بەردى مينيستر.

رەسەيلىك تىكەلەي ينۆەستيتسيا قورى قازاقستاندىق كاسىپورىندارعا تالداۋ جاسادى جانە بيولوگيالىق پرەپاراتتار شىعاراتىن جالعىز كاسىپورىن قاراعاندى فارماتسيەۆتيكالىق زاۋىتى بولىپ شىقتى. قالعان ءوندىرىس تابلەتكا، ءدارى- دارمەك سىندى حيميالىق زاتتاردى كوبىرەك شىعارادى.

«سول سەبەپتى جالعىز ءوندىرىس تاڭدالدى، سودان كەيىن، ارينە، بەلسەندى جۇمىس باستالدى. 1- اقپانعا دەيىن ۆاكتسينانىڭ العاشقى پارتياسىن جەتكىزۋ مىندەتى تۇردى. ءبىز كۇن سايىن بايلانىستا بولدىق. قاراعاندى فارمزاۋىتىنىڭ باسشىلىعى ءوز ءوندىرىسىنىڭ ءبىر بولىگىن توقتاتىپ، ءوندىرىس الاڭىن قايتا قۇردى، بارلىق لوگيستيكانى پىسىقتادى، تەكسەردى، قوسىمشا ۆاليداتسيا جاسادى. وسىدان كەيىن سول جەردە ءوندىرىستى ىسكە قوستىق. ياعني، بۇل ۆاكتسينا ءوندىرىسىن قازاقستاندا باستاۋدىڭ ەڭ جىلدام نۇسقالارىنىڭ ءبىرى بولدى»، - دەپ ءتۇسىندىردى ا. سوي.

بۇگىنگى تاڭدا 13301 مەديتسينا قىزمەتكەرىنە ەكپە ەگىلدى، 218 مەديتسينا قىزمەتكەرىن ۆاكتسينالاۋ (مەديتسينالىق كورسەتكىشتەر بويىنشا) كەيىنگە قالدى. 130 مەديتسينا قىزمەتكەرى نەمەسە %0,9 ۆاكتسيناتسيادان باس تارتتى. ال قاراشادان قاڭتارعا دەيىن 2607 مەديتسينا قىزمەتكەرى اۋىرىپ قالدى، ونىڭ ىشىندە 2440 ماماندا كوروناۆيرۋس ينفەكتسياسى راستالدى، ال 167 سىندە - ك ۆ ي مينۋس. ءبىراق ەپيدەميولوگيالىق تەكسەرۋ اياسىندا تەك 225 مەدقىزمەتكەردىڭ اۋرۋى كاسىبي قىزمەتكە بايلانىستى ەكەنى راستالدى. قالعان مامانداردىڭ اۋرۋى كاسىبي قىزمەتپەن بايلانىستى بولماعان.

قايتىس بولعاندار بويىنشا: قاراشادان قاڭتارعا دەيىن 7 مەديتسينا قىزمەتكەرى قايتىس بولدى، ونىڭ 5 ەۋىندە دە اۋرۋ مەديتسينالىق كومەك كورسەتۋمەن، ياعني ءوزىنىڭ كاسىبي قىزمەتىن جۇزەگە اسىرۋمەن بايلانىستى ەمەس. ەكى مەديتسينا قىزمەتكەرى بويىنشا تەكسەرۋ ءالى جالعاسۋدا. وقۋ جىلى باستالعان ساتتەن بەرى 7571 وقۋشى كوروناۆيرۋسپەن اۋىردى. ونىڭ ىشىندە 2158 وقۋشى - وففلاين رەجيمدە، 5413 - ونلاين رەجيمدە ءبىلىم العان. ءۇشىنشى توقساندا 3597 وقۋشى اۋىرىپ قالدى. ونىڭ ىشىندە 1111 - وففلاين، 2486 بالا - ونلاين رەجيمدە وقيتىندار.

سونىمەن بىرگە، ق ر د س م سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا ۇجىمدىق يممۋنيتەتتىڭ قالىپتاسۋىنا قاتىستى ءوز بولجامىن ايتتى.

«قازاقستاندا ۇجىمدىق يممۋنيتەت قالىپتاستىرۋ ءۇشىن شامامەن 10 ميلليون ادامعا ەكپە ەگۋ كەرەك. مۇنشا ادامعا بارلىق ۆاكتسينا دوزاسى قولجەتىمدى بولسا دا، 1-2 ايدا ەكپە سالا المايتىنىمىزدى ءتۇسىنۋ كەرەك. سوندىقتان، ۋاقىت شەگەرىپ، جىلدىڭ سوڭىنا ءتىپتى 2022-جىلعا دا كەتۋى مۇمكىن. سوندىقتان، وسى ارالىقتىڭ بارىندە ماسكا تاعۋ قاجەت»، - دەدى ايجان ەسماعامبەتوۆا ورتالىق كوممۋنيكاتسيالار قىزمەتىندەگى بريفينگتە ءتىلشى سۇراعىنا بەرگەن جاۋابىندا.

ونىڭ ايتۋىنشا، ۆاكتسينا العان ادامنىڭ وزىندە دە يممۋنيتەت ەڭ كەمى 1,5-ايدا قالىپتاسادى. «دوزالىق كۇنتىزبەگە سۇيەنسەك، انتيدەنەلەر شامامەن 12 كۇندە پايدا بولادى، ەكىنشى دوزانى العان سوڭ، تاعى 3-4 اپتا قاجەت بولادى. ياعني، يممۋنيتەت قالىپتاستىرۋدىڭ وزىنە شامامەن 1,5-اي قاجەت. ونىڭ ۇستىنە يممۋنيتەت بارلىق ادامدا قالىپتاسپايدى، دەرەكتەرگە سۇيەنسەك، 5 پايىز ادامدا يممۋندىق جاۋاپ تۇزىلمەدى. بۇل ادامدار دا قوراۋسىز بولادى. سوندىقتان، ۇجىمدىق يممۋنيتەت جاسامايىنشا، كوروناۆيرۋس ينفەكتسياسىنان قورعالعانىمىزعا كوز جەتكىزبەيىنشە، ماسكا تاعۋدى جالعاستىرامىز»، - دەيدى ا. ەسماعامبەتوۆا.

ودان بولەك، «Ashyq» قوسىمشاسى 13 مىڭنان استام بيزنەس سۋبەكتىسىنىڭ قىزمەتىن قايتا قالپىنا كەلتىرۋگە كومەكتەسەدى جانە پيلوتتىق رەجيمدە الماتى، نۇر- سۇلتان جانە قاراعاندى قالالارىندا قىزمەت كورسەتۋگە رۇقسات ەتىلگەن 40 نىساندا ىسكە قوسىلدى. «Ashyq» موبيلدى قوسىمشاسى QR- كود ارقىلى جانە دەنساۋلىق ساقتاۋ مينيسترلىگىنىڭ ورتاق بازاسىمەن ينتەگراتسيالاۋ ارقىلى كەلۋشىنىڭ مارتەبەسىن، ونىڭ ۆيرۋس تاسىمالداۋشىسى ەمەس ەكەنىن انىقتاۋعا مۇمكىندىك بەرەدى.

سونداي- اق نىسانداردىڭ كەلۋشىلەردى قابىلداۋعا ازىرلىگىن جانە ولاردىڭ سانيتارلىق تالاپتارعا سايكەستىگىن كورسەتەدى. «QR- كود تەك بيزنەس سۋبەكتىلەرىنە بەرىلەدى. كەلۋشى «Ashyq» ءموبيلدى قوسىمشاسىن ءوز تەلەفونىنا جۇكتەپ، تەلەفون ءنومىرى بويىنشا اۆتوريزاتسيالاۋدان ءوتۋى (ج س ن ەنگىزۋى) جانە مەكەمەنىڭ QR- كودىن سكانەرلەۋى قاجەت. تۇستەرگە ءبولۋ الەۋمەتتىك جەلىلەردە تالقىلانعانداي، ادامداردىڭ ءومىرىن «باقىلاۋعا» جانە «قاداعالاۋعا» ارنالماعان.

بۇل ناۋقاستى انىقتايدى نەمەسە ادامنىڭ كارانتيندەگى پاتسيەنتپەن جاقىن بايلانىسى بارى-جوعىن كورسەتەدى.