اجار عينيات قازاقستاندا قاشان ماسكاسىز جۇرۋگە بولاتىنىن ايتتى

نۇر- سۇلتان. قازاقپارات - بۇگىن ورتالىق كوممۋنيكاتسيالار قىزمەتىندە ق ر دەنساۋلىق ساقتاۋ ۆيتسە- ءمينيسترى اجار عينيات قازاقستاندا قاشاننان باستاپ مەديتسينالىق ماسكاسىز جۇرۋگە بولاتىنىن ايتتى، دەپ حابارلايدى قازاقپارات ءتىلشىسى.

«قازىرگى كەزدە ەلىمىزدە رەسەيلىك سپۋتنيك V ۆاكسياناسىن ەگۋ ءجۇرىپ جاتىر. الداعى ۋاقىتتا قازاقستاندىق ۆاكسينا بولادى. وتاندىق ۆاكسينا كلينيكالىق زەرتتەۋلەردەن ءوتىپ جاتىر»، - دەدى ۆيتسە- مينيستر تىلشىلەر ساۋالىنا جاۋاپ بەرە وتىرىپ.

سونىمەن قاتار ا. عينيات قازىرگى ۋاقىتتا Pfizer ۆاكسيناسىن قازاقستانعا الىپ كەلۋ تۋرالى ناقتى كەلىسسوزدەر جۇرگىزىلمەگەنىن جەتكىزدى. ۆيسە- مينيستر ۆاكسينا قويىلعان جاعدايدا ماسكاسىز ءجۇرۋ مۇمكىندىگى تۋرالى قويىلعان سۇراققا جاۋاپ بەردى.

«حالىقتىڭ ورتاسىندا ۇجىمدىق يممۋنيتەت قالىپتاسپاي، حالىقتىڭ 60 پايىزدان استامى ۆاكسينالاۋدان وتپەي، ماسكانى شەشۋگە بولمايدى. ۇجىمدىق يممۋنيتەت قالىپتاسقاننان كەيىن عانا ماسكاسىز جۇرۋگە بولادى»، - دەدى اجار عينيات.

اۆتور: رۋسلان عابباسوۆ