تۇركيادا عارىشقا ۇشاتىن العاشقى ادام ايەل بولۋى مۇمكىن

بۇل تۋرالى بۇگىن انادولى اگەنتتىگى رەداكتورلارىنىڭ دوڭگەلەك ۇستەلى بارىسىندا تۇركيانىڭ ونەركاسىپ جانە تەحنولوگيالار ءمينيسترى مۇستافا ۆارانك ءمالىم ەتتى، دەپ حابارلايدى قازاقپارات انادولى اگەنتتىگىنە سىلتەمە جاساپ.
ۆەدومستۆو باسشىسىنىڭ ايتۋىنشا، عارىش باعدارلاماسىن ىسكە اسىرۋ جەكەلەگەن ەلدىڭ ادامي كاپيتالى مەن قارجى مۇمكىندىكتەرىنە عانا بايلانىستى ەمەس. مۇندا كوپتەگەن ماسەلەنىڭ شەشىمىن جەڭىلدەتە الاتىن ساياسي قولداۋ ماڭىزدى، دەپ اتاپ ءوتتى ۆارانك.
«ۇلتتىق عارىش باعدارلاماسى تۇركيانى ماكسيمالدى قوسىلعان قۇنى بار ءونىمدى شىعاراتىن كوشباسشىلار قاتارىنا شىعارادى. بۇل باعدارلاما - بۇكىل ەلدىڭ نامىسى»، - دەدى مينيستر.
مينيسترلىك باسشىسى تۇركيانىڭ عارىشتاعى ءبىرىنشى ازاماتى ايەل ادام بولۋىن ەل پرەزيدەنتى رەجەپ تايىپ ەردوعاننىڭ ءوزى قالايتىنىن اتاپ ءوتتى. ءبىز وربيتاعا بۇل ميسسيا ءۇشىن ەلدىڭ ەڭ لايىقتى تۇرعىنىن جىبەرەمىز، دەپ اتاپ ءوتتى ول.
ۆارانك تۇرىك ينجەنەرلەرى جاساعان تەحنولوگيالاردىڭ عارىشتىڭ زەرتتەلۋىنە ۇلەس قوساتىنىن اتاپ ءوتتى. ول تۇركيانىڭ عارىش ەكونوميكاسى سالاسىندا ماڭىزدى ويىنشى بولاتىنىنا سەنىم ءبىلدىردى. سونداي- اق مينيستر تۇركيانىڭ عارىش سالاسىندا ءۇش ەلمەن ىنتىماقتاستىق تۋرالى كەلىسىمگە قول قويعانىن حابارلادى. بۇدان بولەك، پاكىستان جانە ازەربايجان ەلدەرىمەن كەلىسىم ازىرلەنىپ، كوپ ۇزاماي ولارعا دا قول قويىلادى.
اۆتور: زارينا تۋعانبايەۆا