قازاق ۇعىمىندا «ۆولونتەر»، «مەسەنات» بۇرىننان بار - كاسىپكەر

نۇر-سۇلتان. قازاقپارات - اقتوبەلىك كاسىپكەر قايىرىمدىلىق ءىس جاساۋدىڭ قازاق حالقىنىڭ قانىندا بارىن ايتا كەلە، بۇقارانى قايىرىمدىلىقپەن اينالىسۋعا شاقىردى، دەپ حابارلايدى قازاقپارات ءتىلشىسى.

«ءبىزدىڭ قور 15 جىل بويى ءارتۇرلى سالادا قىزمەت جاساپ كەلەدى. ونىڭ نەگىزىن قۇرۋشى يسلامبەك سالجانوۆ دەگەن اقتوبەلىك ازامات. ءوزى اۋىلدىق جەردەن شىققان. ءوز اۋىلىندا 150 ورىندىق زاماناۋي بالاباقشا، سونداي-اق مەملەكەتپەن بىرىگىپ مۋزەي سالعان. ودان دا باسقا قازىرگى تاڭدا 40 تان استام ءىستى جۇزەگە اسىرىپ جاتىرمىز. سونىمەن قاتار ءبىلىم سالاسىنىڭ دامۋىنا دا ءوز ۇلەسىمىزدى قوسىپ جاتىرمىز. ونىڭ ىشىندە اۋىلدىق بالالاردى ۇ ب ت- عا جانە شەتەلگە وقۋعا تۇسۋگە تەگىن دايىنداپ جاتىرمىز. ايتارىم، كاسىپكەرلەر دە قوعامنىڭ ءبىر بولشەگى، قولىمىزدان كەلگەنشە كومەكتەسەمىز»، - دەدى «Altyn Qyran Foundation» قوعامدىق قورىنىڭ اتقارۋشى ديرەكتورى ماقسۇتبەك ايتماعامبەت.

ونىڭ ايتۋىنشا، قازاق ءتىلى، تاريح جانە ءتول مادەنيەتتى قولداۋ مەن دامىتۋعا ارنالعان شارالار ءوز جالعاسىن تابادى.

«ءبىر قۋانتارلىعى، مەملەكەت باسشىسىنىڭ باستاماسىمەن جاريالانعان ۆولونتەر جىلىنىڭ ودان ءارى جالعاسىپ جاتقانى. تاعى ءبىر ايتىپ وتەتىن دۇنيە، بىزگە ەندى جەتىپ جاتقان «ۆولونتەر»، «مەسەنات» سوزدەرى قازاق ۇعىمىندا بۇرىننان بار. ءبىزدىڭ تاريحىمىزدا حالىق دالادا قالماعان، تۇرمە دەگەن تۇسىنىك بولماعان. ءبىزدىڭ حالىق ءاردايىم قايىرىمدى بولعان. جەتىم-جەسىرىن دالاعا تاستاماعان، بۇل ءبىزدىڭ قانىمىزدا بار. ەندى ءبىز سونى «رۋحاني جاڭعىرۋ» باعدارلاماسى اياسىندا قايتا زاماناۋي تۇردە جاڭعىرتۋىمىز كەرەك»، - دەيدى ول.

ايتا كەتسەك، ەلوردادا قر اقپارات جانە قوعامدىق دامۋ ءمينيسترى ايدا بالايەۆانىڭ قاتىسۋىمەن «قايىرىمدىلىق ىستەر» مارافونى رەسپۋبليكالىق اكسياسىنىڭ سالتاناتتى اشىلۋ ءراسىمى ءوتىپ جاتىر.

اۆتور: ءالي يبرايەۆ