ەلوردا تۇرعىندارىن نە مازالايدى
بۇل تۋرالى بۇگىن قالا تۇرعىندارىمەن ەسەپ بەرۋ كەزدەسۋىندە ەلوردا اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.
«قالادا بارلىعى 16 تۇرعىن الابى بار، وندا 300 مىڭعا جۋىق ادام تۇرادى. بۇل - بۇكىل ەلوردا حالقىنىڭ تورتتەن ءبىرى. تۇرعىن الاپتارى تۇرعىندارىن نە مازالايدى؟ ءبىز پروبلەمالاردى ساراپتاما، توپتاعان كەزدە مىناداي ماسەلەلەردى انىقتادىق. ءبىرىنشىسى - كارىز جۇيەسى، سۋ قۇبىرى، گازداندىرۋ سىندى ينجەنەرلىك ينفراقۇرىلىم. كەلەسىسى - كوگالداندىرۋ، جول ينفراقۇرىلىمىن دامىتۋ، الەۋمەتتىك نىساندار سالۋ، ەمحانا، مەكتەپ، سپورت نىساندارى. 2020 -جىلى اۋقىمدى جۇمىس جۇرگىزدىك»، - دەدى قالا باسشىسى.
ەلوردا اكىمى جەكەمەنشىك ۇيىمداردىڭ وكىلدەرىمەن بىرنەشە رەت كەزدەسۋدىڭ ارقاسىندا، ءۇيدىڭ ىشىنە گاز تارتۋ قۇنىن ورتاشا العاندا 30 پايىزعا تومەندەتۋ مۇمكىن بولعانىن ايتتى.
«گاز تارتۋ بويىنشا ۇلكەن جۇمىس اتقارىلدى. بيىلعى جىلىتۋ ماۋسىمىندا تەمىرجول، كوكتال-2 تۇرعىن الاپتارىنىنىڭ تۇرعىندارى، اگروقالاشىقتىڭ ءبىر بولىگى گازعا كوشۋ مۇمكىندىگىنە يە بولدى. ءقازىر كوكتال-1, ءوندىرىس، وڭتۇستىك- شىعىس تۇرعىن الاپتارىندا قۇرىلىس- مونتاج جۇمىستارى ءجۇرىپ جاتىر. 300 شاقىرىم گاز تاراتۋ جەلىلەرى سالىندى. گازداندىرۋ - ەلباسىنىڭ تاريحي جوباسى»، - دەدى التاي كولگىنوۆ.
ونىڭ ايتۋىنشا، 2020 -جىلى ەلوردانىڭ تۇرعىن الاپتارىندا 100 استام كوشەگە اسفالت توسەلدى، 40 استام قوعامدىق كەڭىستىك، اۋلالار اباتتاندىرىلدى. ءبىرقاتار الەۋمەتتىك نىسان سالىندى، ونىڭ ىشىندە مەكتەپتەر دە بار.
اۆتور: مارلان جيەمباي
