كوپ سىنعا ۇشىراعان ەلوردانىڭ جاۋىن-شاشىن كارىزى جۇيەسى ماسەلەسى قالاي شەشىلمەك

نۇر-سۇلتان. قازاقپارات - بۇگىن قالا تۇرعىندارىمەن ەسەپ بەرۋ كەزدەسۋىندە ەلوردا اكىمى التاي كولگىنوۆ جاۋىن- شاشىن كارىزى جۇيەسى ماسەلەسى قالاي شەشىلىپ جاتقانىن ايتتى، دەپ حابارلايدى قازاقپارات ءتىلشىسى.

«جاۋىن-شاشىن كارىزى جۇيەسىنە قاتىستى سىن كوپ. قالا جىلدام ءوسىپ كەلە جاتىر. ءتىپتى الەمدەگى، ەڭ قارقىندى دامۋشى قالالاردىڭ ءبىرى دەسەك تە بولادى. حالق سانى ءوسىپ، جاڭا جولدار، جاڭا نىساندار پايدا بولۋدا. جاڭا شاعىن اۋداندار دا سالىنىپ جاتىر. ينجەنەرلىك ينفراقۇرىلىم ماسەلەسى كۇنتارتىبىندە تۇر. جاۋىن- شاشىن كارى جۇيەسىنە بايلانىستى Elorda eco systems كاسىپورنىن قۇردىق. ول ءدال وسى ماسەلەمەن اينالىسادى. قالادا بىرنەشە پروبلەمالى ۋچاسكە بار. ولار: باۋىرجان مومىش ۇلى داڭعىلى، ج. تاشەنوۆ، رەسپۋبليكا داڭعىلى جاقتان ا. يمانوۆ كوشەلەرى، تۇران، ۇلى دالا داڭعىلدارى. مومىش ۇلى بويىنشا جۇمىستى اياقتاپ، ديامەترى ۇلكەن قۇبىر توسەدىك، قوسىمشا سورعىش قويدىق. ۇلكەن جۇمس جاسالدى. قازىرگى ۋاقىتتا ول جەردە بۇرىنعىداي پروبلەما جوق»، - دەدى التاي كولگىنوۆ.

ونىڭ ايتۋىنشا، تاشەنوۆ كوشەسى بۇرىن باتپاقتى جەر بولعان. وسى تۇسقا تازارتۋ قوندىرعىسى ورناتىلدى. ول 42 مىڭ تەكشە مەتر جاۋىن-شاشىن سۋىن جيناپ، تازارتىپ، ودان كەيىن وزگەنگە اعىزىپ وتىراتىن بولادى.

«Elorda eco systems كاسىپورىندارى قۇدىقتاردى تازارتۋمەن دە اينالىسادى. ماسەلەن، تاشەنوۆ كوشەسىنىڭ بويىنداعى ءبىر عانا ۋچاسكەدەن 30 مىڭ توننادان استام قوقىس شىعارىلدى. ارىقتار مەن قۇدىقتان 2,5 مىڭ توننا قوقىس الىندى»، - دەدى ول.

سونداي-اق، ەلوردا اكىمى «تەلمان» تۇرعىن الابىنداعى ماگيسترالدى كوللەكتور مەن تازارتۋ قوندىرعىسى جۇمىستارىنىڭ اياقتالعانىن اتاپ ءوتتى. ونىڭ قۋاتى تاۋلىگىنە 36 مىڭ تەكشە مەتردى قۇرايدى. بۇل جوبانى جۇزەگە اسىرۋ «تەلمان» تۇرعىن الابى مەن №27-كوشە بويىنداعى جانە باسقا دا قۇرىلىسى قارقىندى ءجۇرىپ جاتقان اۋماقتى سۋ باسۋدان قورعاۋعا مۇمكىندىك بەرەدى.