ەرلان تۇرعىمبايەۆ ت م د ەلدەرىندە جازاسىن وتەپ جاتقان ازاماتتار تۋرالى ايتتى

نۇر-سۇلتان. قازاقپارات - پارلامەنت ءماجىلىسىنىڭ جالپى وتىرىسىندا «تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ باس بوستاندىعىنان ايىرۋمەن بايلانىستى ەمەس جازالاردى ورىنداۋدى بەرۋ تۋرالى كونۆەنتسيانى راتيفيكاتسيالاۋ تۋرالى» زاڭ جوباسى ماقۇلداندى، دەپ حابارلايدى قازاقپارات ءتىلشىسى.

قۇجاتقا ت م د مەملەكەتتەرىنىڭ باسشىلارى 2019-جىلعى 11- قازاندا اشعاباد قالاسىندا قول قويدى.

كونۆەنتسيانىڭ نەگىزگى ماقساتى - ءار ازاماتقا ءوز جازاسىن تۇرعىلىقتى جەرى بويىنشا وتەۋگە مۇمكىندىك بەرۋ.

«كونۆەنتسياعا سايكەس سوتتالۋشى نەمەسە ونىڭ زاڭدى وكىلى ءوز جازاسىن تۇرعىلىقتى جەرىندە وتەۋ تۋرالى ءوتىنىش بەرەدى. ءوتىنىش بويىنشا سول ەلدىڭ باس پروكۋراتۋراسى سۇراۋ سالادى»، - دەدى ق ر ىشكى ىستەر ءمينيسترى ەرلان تۇرعىمبايەۆ.

سۇراۋ سالۋعا مىنا قۇجاتتار قوسا بەرىلەدى: سوتتالۋشىنىڭ ازاماتتىعى، سوت شەشىمىنىڭ كوشىرمەسى، مىنەزدەمە، كەلتىرىلگەن شىعىن تۋرالى مالىمەتتەر.

«جازاسىن وتەۋشىنى قابىلدايتىن مەملەكەت بەلگىلەنگەن جازادان قاتاڭ ەمەس جازا تاعايىندايدى. جازاسىن وتەۋشى شەشىم قابىلداعان سوڭ، 45 كۇندە ءوز بەتىنشە ەلدەن شىعۋى ءتيىس. ال ەگەر بۇل تالاپ ورىندالماسا، زاڭ بويىنشا ءماجبۇرلى تۇردە ەلدەن شىعارىلادى. سۇراۋ سالۋدان باس تارتۋ نەگىزدەرى دە قاراستىرىلعان. ۇلتتىق زاڭناماعا سايكەس جازاسىن وتەۋشىنىڭ ارەكەتى قىلمىس بولىپ سانالماسا، قىلمىستىڭ مەرزىمى ءوتىپ كەتسە، ەل تاۋەلسىزدىگى مەن ۇلتتىق قاۋىپسىزدىگىنە قاۋىپ بولسا، ۇلتتىق زاڭناماعا قايشى وزگە دە جاعدايدا باس تارتىلادى»، - دەدى مينيستر.

ونىڭ ايتۋىنشا، قازىرگى ۋاقىتتا ەلىمىزدە 447 شەتەل ازاماتى پروباتسيادا تۇر. ولاردىڭ اراسىندا وزبەكستاننان 216، رەسەيدەن - 138، قىرعىزستاننان - 38، ارمەنيادان 5 ازامات بار. ال وزگە ەلدەردە 280 قازاقستان ازاماتى جازاعا تارتىلعان. سونىڭ ىشىندە رەسەيدە 251، وزبەكستاندا - 24، قىرعىزستاندا - 2، بەلارۋستا ءۇش ازامات بار.