«مۇقاعالي» كوركەم فيلمى كۇزدە كورسەتىلۋى مۇمكىن

نۇر-سۇلتان. قازاقپارات - رەجيسسەر بولات قالىمبەتوۆتىڭ «مۇقاعالي» كوركەم فيلمىنىڭ كورسەتىلىمى پاندەمياعا بايلانىستى كەيىنگە قالدىرىلدى، دەپ حابارلايدى قازاقپارات ش. ايمانوۆ اتىنداعى «قازاق فيلم» كينوستۋدياسىنا سىلتەمە جاساپ.

«بۇگىن قازاقتىڭ اقيىق اقىنى مۇقاعالي ماقاتايەۆتىڭ تۋعانىنا - 90 جىل. بەلگىلى رەجيسسەر بولات قالىمبەتوۆتىڭ فيلمىنە ونىڭ قيلى تاعدىرى مەن ماعىنالى عۇمىرى نەگىز بولدى. نەبارى 45 جىل عۇمىرىندا ولمەس ولەڭ جازىپ، وشپەس ءىز قالدىرعان اقىن تىرىسىندە لايىقتى باعاسىن المادى. الايدا ءومىرىن شىعارماشىلىققا ارناعان اقىن ەشقاشان مويىعان ەمەس. «قازاق فيلم» كينوستۋدياسى تۇسىرگەن «مۇقاعالي» فيلمىنىڭ تۇساۋكەسەرى پاندەمياعا بايلانىستى كەيىنگە شەگەرىلۋدە، ءبىراق وسى كۇزدە كورەرمەندەر بۇل فيلمدى ۇلكەن ەكراندا كورەدى دەپ ۇمىتتەنەمىز»، - دەپ جازىلعان كينوستۋديانىڭ Facebook پاراقشاسىندا.

ەسكە سالا كەتەيىك، فيلمنىڭ ءتۇسىرىلىم جۇمىستارى وتكەن جىلدىڭ ماۋسىم ايىندا باستالعان. نەگىزگى ەپيزودتار الماتى وبلىسى مەن الماتى، وسكەمەن قالالارىندا جانە سانكت-پەتەربۋرگتە ءتۇسىرىلدى.

كارتيناعا اقىن ءومىرىنىڭ سوڭعى جىلدارى ارقاۋ بولعان. مۇقاعالي ماقاتايەۆ - قازاقتىڭ ليريك اقىنى. از عۇمىرىندا بىرنەشە ليريكالىق جىر جيناعى مەن داستاندارى جارىق كورگەن. اۋدارما سالاسىندا شەكسپيردىڭ سونەتتەرىن، دانتەنىڭ «قۇدىرەتتى كومەدياسىن» قازاقشالادى.

اقىننىڭ «سارجايلاۋ»، «سونبەيدى اجە، شىراعىڭ»، «كەل، ەركەم، الاتاۋىڭا» ولەڭدەرىنە سازگەر نۇرعيسا تىلەنديەۆ ءان شىعارعان.

مۇقاعالي ماقاتايەۆ 1931-جىلى 9- اقپاندا الماتى وبلىسى قازىرگى رايىمبەك اۋدانىنىڭ قاراساز اۋىلىندا دۇنيەگە كەلىپ، 1976-جىلدىڭ 27- ناۋرىزىندا الماتىدا دۇنيەدەن وتكەن.