فيرۋزا ءشارىپوۆا كەلەسى جەكپە-جەگىن قاشان وتكىزەتىنى ءمالىم بولدى

نۇر-سۇلتان. قازاقپارات - قازاقستاندىق كاسىپقوي بوكسشى فيرۋزا ءشارىپوۆا رەسەيلىك بوكسشى، وليمپيادا ويىندارىنىڭ جۇلدەگەرى سوفيا وچيگاۆامەن كەزدەسەدى.

جەكپە-جەك بيىلعى ءساۋىر ايىندا قازاندا وتەدى، دەپ حابارلايدى قازاقپارات.

26 جاستاعى ف. ءشارىپوۆا پروفيدەگى 12-جەڭىسىنە بىلتىرعى قازان ايىندا جەتكەن بولاتىن. ول سەربيالىق سارا ماريانوۆيچپەن (7-7، 3 ك و) وتكەن ايقاستى تورەشىلەردىڭ ءبىراۋىزدى شەشىمىمەن جەڭدى. ءشارىپوۆانىڭ ەنشىسىندە ءبىر عانا جەڭىلىس بار. ول 2016-جىلى سوفيا وچيگاۆاعا ەسە جەبىرگەن ەدى.

ايتا كەتسەك، بۇل - قوس بۇرىمدى ءۇشىن دە دەبيۋدتىك ايقاس بولاتىن. ۆكونتاكتە الەۋمەتتىك جەلىسىندەگى «قازاقستاننىڭ كاسىپقوي بوكسى» پاراقشاسىندا جازىلعانداي، الەمنىڭ ەكى دۇركىن چەمپيونى جانە ەۋروپا چەمپيوناتتارىنىڭ ءۇش دۇركىن جەڭىمپازى س. وچيگاۆا كاسىپقوي رينگتە 4 رەت جەڭىسكە جەتكەن بولاتىن.

رەسەيلىك قىز بۇعان دەيىنگى كەزدەسۋىن وتكەن جىلدىڭ جەلتوقسانىندا وتكىزدى. ول وتانداسى يۋليا كۋتسەنكودان ۇستەم بولىپ، جەڭىل سالماقتاعى WBC Silver بەلدىگىن جەڭىپ الدى.

«وچيگاۆا مەن ءشارىپوۆا جەكپە-جەكتى قازاندا ءساۋىر ايىندا وتكىزەدى. 3- جانە 10- ءساۋىر داتالارى قاراستىرىلۋدا. سونداي-اق بۇل ايقاس تيتۋلدى بولۋى ءۇشىن كەلىسسوزدەر جۇرگىزىلۋدە»، - دەپ ءمالىم ەتكەن ءشارىپوۆا مەن وچيگاۆانىڭ مەنەدجەرى سەرگەي زاۆيليەۆسكي ريا جاڭالىقتار اگەنتتىگىنە.

ايتا كەتسەك، ولار ريەۆانشتى جازدا وتكىزۋى مۇمكىن ەدى. الايدا كوروناۆيرۋس پاندەمياسىنا بايلانىستى كەزدەسۋ بىرنەشە رەت كەيىنگە قالدىرىلدى.