عالىمدار: اۋا رايىنىڭ وزگەرۋى كوروناۆيرۋس ىندەتىنىڭ پايدا بولۋىنا اسەر ەتتى

نۇر-سۇلتان. قازاقپارات - عالىمدار اۋا رايىنىڭ وزگەرۋى كوروناۆيرۋس ىندەتىنىڭ پايدا بولۋىنا اسەر ەتتى دەيدى. بيىل جەر بەتىندەگى كليماتتىڭ لاستانۋىنا قارسى كۇرەس كۇشەيە ءتۇسۋى ءتيىس.

بۇل - بىرىككەن ۇلتتار ۇيىمىنىڭ باس حاتشىسى انتونيۋ گۋتەررەشتىڭ پىكىرى. ۇيىم باسشىسى جەكەلەگەن مەملەكەتتەر مەن مەكەمەلەردى اۋانى لاستاۋشى زاتتاردى مەيلىنشە ازايتۋعا شاقىرىپ وتىر.

الەمدە كوروناۆيرۋس ىندەتىنەن بولەك ءالى كۇنگە دەيىن شەشىمىن تاپپاي كەلە جاتقان وزەكتى ماسەلەلەر كوپ. سونىڭ ءبىرى - كليماتتىڭ وزگەرۋى. جۋىردا عانا Microsoft باسشىسى بيلل گەيتس وسىلاي دەگەندى. ءبىراق بىرىككەن ۇلتتار ۇيىمى ىندەتتىڭ اياقتالعانىن كۇتپەي، ىسكە قازىردەن باستاپ كوشۋدى شەشتى. ماقسات - 2030 -جىلعا قاراي زياندى زاتتار قالدىعىن نولگە جەتكىزۋ. انتونيۋ گۋتەررەشتىڭ ايتۋىنشا، ول ءۇشىن دامىعان مەملەكەتتەر دامۋشى ەلدەردەگى كليماتتىق باعدارلامالاردى قارجىلاندىرۋعا جىل سايىن 100 ميلليارد دوللار ءبولۋى كەرەك.

انتونيۋ گۋتەرريش، ب ۇ ۇ باس حاتشىسى:

- اۋانى لاستاۋشى زاتتار قالدىعىن نولگە جەتكىزۋ كەز كەلگەن ەل مەن قالاعا، كومپانيا مەن مەكەمە ءۇشىن قالىپتى جاعدايعا اينالۋى كەرەك. بۇل اۆياتسيا، اۋىل شارۋاشىلىعى مەن ونەركاسىپ سالالارىنا دا قاتىستى نارسە. بىرىككەن ۇلتتار ۇيىمى اۋاعا كەتەتىن زياندى زاتتاردىڭ كولەمىن ازايتۋعا مەملەكەتتەردىڭ قاۋقارى ابدەن جەتەتىنىن ايتادى.

«2020 -جىلى ءوندىرىستىڭ جاپپاي توقتاپ قالۋى سونىڭ ايقىن دالەلى»، - دەيدى ولار.

ماسەلەن، ونەركاسىپتىك شىعارىندىلار كولەمى جاعىنان كوش باستاپ تۇرعان قىتايدا ىندەت كەزىندە اۋانىڭ لاستانۋ دەڭگەيى الدەقايدا تومەندەگەن. بەيجىڭدەگى ەكولوگيا بيۋروسى كەلتىرگەن مالىمەتكە سايكەس، قىتاي استاناسىنداعى تازا اۋا 276 كۇن بويى ساقتالىپ تۇرعان. بۇل الدىڭعى جىلعا قاراعاندا 1 ايعا ۇزاق ەكەن.

يۋ دجينحۋا، بەيجىڭدەگى ەكولوگيا بيۋروسى ديرەكتورىنىڭ ورىنباسارى:

- بەيجىڭدەگى ەكولوگيالىق احۋالدى جاقسارتۋ ءۇشىن بىرنەشە شارا قولعا الىندى. ماسەلەن، تەحنيكالىق باقىلاۋ كۇشەيتىلدى. سونىمەن قاتار اۋاعا بولىنەتىن زياندى زاتتار كولەمىن قىسقارتۋ بويىنشا شارالار قابىلداندى.

جالپى كليماتتىڭ وزگەرۋى كوروناۆيرۋستىڭ پايدا بولۋىنا دا تۇرتكى بولعان كورىنەدى. كەمبريدج ۋنيۆەرسيتەتىنىڭ عالىمدارى وسىنداي بايلامعا كەلىپ وتىر. اۋا تەمپەراتۋراسىنىڭ كوتەرىلۋى مەن قىتايدىڭ وڭتۇستىگىندەگى وسىمدىكتەردىڭ وزگەرۋى ەلدەگى جارقاناتتار سانى كوبەيۋىنە اكەلگەن. ال ءبىز بىلەتىندەي، ءدال وسى قۇستار COVID-19-دىڭ تاراتۋشىسى بولىپ سانالادى. كوبەيگەندەر قاتارىندا تەك جارقاناتتار عانا ەمەس، سۋسيىر مەن كەنگۋرۋ دا بار. كەزىندە كولۋمبياعا ەسىرتكى بارونى پابلو ەسكوبار اكەلگەن سۋسيىرلاردىڭ قازىر كوبەيىپ كەتكەنى سونشا، ولار بۇكىل ەكوجۇيەگە قاۋىپ توندىرە باستاپتى. ال اۆستراليادا كەنگۋرالار سانى تىم ارتىپ كەتكەن.

www.24.kz