كارانتين: الەم ەلدەرى كوروناۆيرۋسپەن قالاي كۇرەسىپ جاتىر

نۇر- سۇلتان. قازاقپارات - كوروناۆيرۋستىڭ تارالۋىنا قارسى ۆەدومستۆوارالىق كوميسسيا الەمدەگى ەپيدەميولوگيالىق احۋالعا شولۋ جاسادى، دەپ حابارلايدى قازاقپارات.

ۇلى بريتانيا COVID-19 تارالۋى بويىنشا الەمدە ءتورتىنشى ورىنعا شىقتى: مۇندا 4 ميلليونعا جۋىق ادام ىندەتتى جۇقتىرعان. قايتىس بولعاندار سانى بويىنشا ەل بەسىنشى ورىندا - 112 مىڭنان استام ادام. بريتاندىقتار ەۋروپاداعى ەڭ ناشار كورسەتكىشكە يە، ەل لوكداۋن رەجيمىندە ءومىر ءسۇرۋدى جالعاستىرۋدا. دۇكەندەردىڭ كوپشىلىگى جابىق، وقۋشىلار قاشىقتان وقىپ جاتىر، مەيرامحانالار جانە كافەلەر تەك وزىمەن الىپ كەتۋ رەجيمىندە جۇمىس ىستەپ تۇر.

يرلانديا ۇكىمەتى بۇرىن- سوڭدى بولماعان قادام جاسادى، سولتۇستىك يرلانديا تۇرعىندارىنا سەبەپسىز كىرۋگە تىيىم سالدى. ەرەجەنى بۇزۋشىلارعا دۇيسەنبىدەن باستاپ 100 ەۋرو ايىپپۇل سالىنادى. يرلانديا ۇكىمەتى ەل اۋماعىندا ەپيدەميولوگيالىق قاۋىپتىڭ بەسىنشى (ەڭ جوعارى) دەڭگەيىن جاريالادى جانە پاندەميا باستالعاننان بەرىگى ەڭ قاتاڭ كارانتين ەنگىزدە. اتاپ ايتقاندا، يرلانديالىقتارعا ۇيىنەن 5 شاقىرىمنان استام قاشىقتىققا ۇزاپ شىعۋعا تىيىم سالىندى. دۇيسەنبىدەن باستاپ فرانسيا مەكتەپتەرىنىڭ وقۋشىلارىنا قولدان جاسالىنعان بەتپەردەلەردى تاعۋعا تىيىم سالىندى. بۇدان بىلاي مەكتەپكە تەك مەديتسينالىق ماسكالارمەن كەلۋگە رۇقسات ەتىلەدى.

سونىمەن قاتار، فرانتسيا بيلىگى بارلىق سالانىڭ قىزمەتكەرلەرىنە اسحانا مەن كافەگە بارماي- اق جۇمىس ورنىندا تۇسكى اس ىشۋگە مۇمكىندىك بەرۋ ءۇشىن ەڭبەك زاڭناماسىن قايتا قاراۋعا كىرىستى.

اۆستريادا مۇراجايلار، حايۋاناتتار باعى مەن دۇكەندەر اشىلا باستادى، ءبىراق ءبىر ۋاقىتتا كەلۋشىلەر سانىنا شەكتەۋلەر ەنگىزىلدى. شاشتارازدار مەن سۇلۋلىق سالوندارى جۇمىسقا قايتا ورالدى، ءبىراق كەلۋشىلەردەن Covid-19 سىناماسىنىڭ تەرىس ناتيجەسى كورسەتىلگەن انىقتاما تالاپ ەتىلەدى. بەتپەردە تاعۋ بارلىق قوعامدىق ورىنداردا مىندەتتى بولىپ تابىلادى جانە بۇل ءبىر رەتتىك مەديتسينالىق بەتپەردەلەر ەمەس، سۇزگىسى بار كۇردەلى ديزاينداعى ماسكالار بولۋى كەرەك. مەيرامحانالار مەن قوناق ۇيلەر ءالى دە جابىق.

وڭتۇستىك كورەيا استاناسىندا ىندەتتىڭ بەلگىلەرى بار مىسىقتار مەن يتتەردى كوروناۆيرۋسقا تەستىلەۋ ناۋقانى باستالعانى تۋرالى حابارلاندى. سەۋل بيلىگى ءۇي جانۋارلارىنا ادامدارعا قويىلعان ەرەجەلەردىڭ قولدانىلۋى كەرەك دەپ سانايدى: ءۇي جانۋارلارىن سەرۋەندەتۋ كەزىندە يەلەرى ولاردىڭ باسقا جانۋارلار اراسىنداعى ەكى مەتر قاشىقتىقتىڭ ساقتالۋىن قاداعالاپ، تەست وڭ ناتيجەلى بولعان جاعدايدا ەكى اپتاعا تولىعىمەن وقشاۋلانۋى كەرەك.