الماتى وبلىسىندا بۇركىتشى تۋريستەرگە ارنالعان ەتنواۋىل اشۋدى جوسپارلاپ وتىر

تالدىقورعان. قازاقپارات - الماتى وبلىسىندا كاسىبي بۇركىتشى قۋانىش يسابەكوۆ تۋريستەرگە ارنالعان ەتنواۋىل اشۋدى جوسپارلاپ وتىر، دەپ حابارلايدى قازاقپارات ءتىلشىسى.

ول ەتنواۋىل ءوزى تۋعان ەڭبەكشىقازاق اۋدانىنداعى نۇرا اۋىلىنىڭ ماڭىندا بوي كوتەرسە دەيدى. ەلدىمەكەن الماتى قالاسىنان 141 شاقىرىم جەردە ورنالاسقان.

«ءدال وسى جەر تۇلكى، قويان مەن باسقا دا اڭداردى اۋلاۋعا ىڭعايلى. جىل سايىن قۇسبەگىلىكتى تاماشالاۋعا 20-30 تۋريست كەلەدى، ولاردىڭ كوبىسى ەۋروپادان. بۇركىتشىنىڭ ونەرى شەتەلدىكتەردىڭ قىزىعۋشىلىعىن تۋدىرىپ وتىر»، - دەيدى قۋانىش يسابەكوۆ.

37 جاستاعى قۋانىش اكەسى مەن اتاسىنان مۇرا بوپ قالعان ءىستى جالعاستىرىپ كەلەدى. 16 جاسىندا ول بۇركىتتى العاش رەت قولعا ۇيرەتىپ، سودان بەرى قۇسبەگىلىكپەن اينالىسادى. وتباسىمەن بىرگە ۇلتتىق قۇسبەگىلىكتىڭ ەرەكشەلىكتەرىنە ارنالعان «جەتى قازىنا» مۇراجايىن دا اشقان.

قۋانىش - رەسپۋبليكالىق جانە حالىقارالىق دەڭگەيدەگى بۇركىتشىلەر بايقاۋىنىڭ جەڭىمپازى. ەندى ءوزىنىڭ سۇيىكتى ءىسىن تولىققاندى تابىستى كاسىپ كوزىنە اينالدىرعىسى كەلەدى. قازىر ونىڭ جەتى بۇركىتى، ەكى قارشىعاسى، ەكى يتەلگىسى جانە سەگىز تازى ءيتى بار.

«تۋريستەر ءۇشىن اڭ اۋلاۋ ءىسى، ءبىزدىڭ تابيعاتىمىز بەن ادەت- عۇرپىمىز وتە قىزىقتى. ادەتتە قۇسبەگىلىك ماۋسىمى قازان ايىندا باستالىپ، اقپاننىڭ ورتاسىنا دەيىن جالعاسادى. ءدال وسى كەزەڭدە تۋريستەر بىرنەشە توپپەن كەلەدى. ولار ءبىزدىڭ تۇرمىسىمىز بەن بۇركىتپەن اڭ اۋلاۋدىڭ ەرەكشەلىكتەرىمەن تانىسادى. تۋريستەر كانادا، ۇلى بريتانيا، شۆەتسيا، گەرمانيا، فرانسيادان. ولاردىڭ اراسىندا كاسىپكەرلەر، ساياحاتشىلار مەن فوتوگرافتار كوپ. كەيبىرى، ءتىپتى، جىل سايىن كەلەدى»، - دەيدى ول.

پاندەمياعا بايلانىستى 2020 -جىلى بۇركىتشىلەر اۋىلىندا تۋريستەر بولمادى. الايدا، اتا كاسىپ يەلەرى ءۇشىن ىشكى تۋريزمدى دامىتۋ باعىتى اشىلدى. وتكەن جىلى قۋانىش يسابەكوۆ الماتى وبلىسىنىڭ كاسىپكەرلەر پالاتاسىنان كەڭەس الىپ، بيزنەس نەگىزدەرىن وقىتاتىن «بيزنەس مەكتەپ» جوباسىنا قاتىستى. كەيىن «بيزنەستىڭ جول كارتاسى - 2025» باعدارلاماسى بويىنشا قايتارىمسىز گرانت الۋعا ءوتىنىم بەردى. جوبا ءساتتى شىعىپ، كوميسسيا جوبانى قارجىلاندىرۋدى ماقۇلدادى. ەندى وسى قاراجاتقا جاس كاسىپكەر ءوز ويىن جۇزەگە اسىرۋدى جوسپارلاپ وتىر.

«قۋانىش يسابەكوۆ «بيزنەستىڭ جول كارتاسى - 2025» باعدارلاماسى بويىنشا قايتارىمسىز گرانت الدى. 3 ملن تەڭگە. ەندى ول وسى قاراجاتپەن كاسىبىن باستايدى»، - دەدى الماتى وبلىستىق كاسىپكەرلەر پالاتاسىنىڭ باسپا ءسوز حاتشىسى دياس بەيسەنبەكوۆ.

ءىستىڭ باسى- قاسىندا، ونى جۇرگىزۋدى جانۇياسى قولعا الماق. قۋانىش ءۇش بالانى تاربيەلەپ وتىر. ول بالالارىن كىشكەنتايىنان باستاپ قۇسبەگىلىككە باۋلىپ كەلەدى.

«بۇركىتتەر ەرەكشە قامقورلىقتى قاجەت ەتەدى. ولارعا جاقسى كۇتىم جاساۋ كەرەك، سۇيىسپەنشىلىك تانىتۋ كەرەك، سوندا عانا ءسىزدى تىڭدايدى. قۇسقا ايقايلاپ ۇيرەتە المايسىڭ. سونىمەن بىرگە، بۇركىتشى جامان ادەتتەردەن اۋلاق بولىپ، «تازا» بولىپ ءجۇرۋى ماڭىزدى. سەبەبى، اسپاندا بيىكتە قالقىپ ۇشاتىن قۇس ءبارىن سەزەدى»، - دەيدى ول.

مۇنىمەن قوسا، قۋانىش يسابەكوۆ قۇسبەگىلىك سالاسى مەملەكەتتىك قولداۋدى قاجەت ەتەدى دەپ سانايدى.

«مىسالى، بۇركىت نەمەسە تازىنى ۇستاۋ وڭاي شارۋا ەمەس. جازدا بۇركىت كۇن سايىن 2-3 كەلى ەت جەيدى. سول سەبەپتى سۋبسيديالاۋدى ەنگىزۋ قاجەتتىلىگىن قاراستىرىپ كورۋ كەرەك. قالاي دەگەندە دە ىنتالاندىرۋ شارالارى قاجەت. موڭعوليا مەن قىرعىزستانداعى بۇركىتشىلەر قازاقستانداعى قۇسبەگىلىك ونەرىنىڭ دامۋىنا ءتانتى. سەبەبى ءبىزدىڭ ەلدە بۇل ونەرمەن اينالىساتىن جاستار سانى كوپ»، - دەيدى ول.

بۇگىندە بۇركىتشى، ءارى كاسىپكەر قۋانىش يسابەكوۆ قۇسبەگىلىكتەن شىعىس قازاقستان وبلىسى مەن تۇركيا رەسپۋبليكاسىندا وتەتىن جارىسقا قاتىسۋعا دايىندىعىن پىسىقتاپ جاتىر.

اۆتور: سامال قابىشيەۆا