ءدارى-دارمەك ءوندىرىسى: الەكسەي سوي «نوبەل» كومپانياسىمەن مەموراندۋمعا قول قويدى

نۇر-سۇلتان. قازاقپارات - ق ر دەنساۋلىق ساقتاۋ مينيسترلىگى مەن «نوبەل» كومپانياسى ءدارى-دارمەك ءوندىرىسى بويىنشا مەموراندۋمعا قول قويدى، دەپ حابارلايدى قازاقپارات.

بۇگىن دەنساۋلىق ساقتاۋ ءمينيسترى الەكسەي سوي «نوبەل يلاچ ساناي ۆە تيدجارەت انونيم شيركەتي» كومپانياسىنىڭ وكىلدەرىمەن ونلاين-كەزدەسۋ وتكىزدى. ونىڭ بارىسىندا ق ر دەنساۋلىق ساقتاۋ مينيسترلىگى مەن شەتەلدىك ينۆەستور اراسىندا «نوبەل الماتى فارماتسيەۆتيكالىق فابريكاسى» ا ق بازاسىندا قازاقستان رەسپۋبليكاسىندا دارىلىك پرەپاراتتار ءوندىرىسىن قۇرۋ بويىنشا ينۆەستيتسيالىق جوبانى ىسكە اسىرۋ تۋرالى ءوزارا تۇسىنىستىك مەموراندۋمىنا قول قويىلدى.

«قۇجاتتىڭ ماقساتى «س ق- فارماتسيا» ج ش س- مەن جاسالعان دارىلىك زاتتاردى جەتكىزۋدىڭ ۇزاق مەرزىمدى شارتى شەڭبەرىندە قازاقستاندا دارىلىك پرەپاراتتار ءوندىرىسىن قۇرۋ، «نوبەل الماتى فارماتسيەۆتيكالىق فابريكاسى» ا ق ينۆەستيتسيالىق جوباسىن ىسكە اسىرۋ»، - دەدى ا. سوي.

مينيستر «نوبەل» كومپانياسى الەمدەگى ەڭ ءىرى فارماتسيەۆتيكالىق وندىرۋشىلەردىڭ ءبىرى ەكەنىن جانە ق ر دەنساۋلىق ساقتاۋ مينيسترلىگى ەكىجاقتى ىنتىماقتاستىققا زور ءمان بەرەتىنىن اتاپ ءوتتى.

ق ر- دا دارىلىك پرەپاراتتار ءوندىرىسى بويىنشا اتالعان ينۆەستيتسيالىق جوبا 2025-جىلعا دەيىن ىسكە اسىرىلادى دەپ جوسپارلانعان. ونىڭ شەڭبەرىندە 400 گە جۋىق جاڭا جۇمىس ورنى اشىلماق.

«دارىلىك پرەپارات ءوندىرىسى ق ر ەكونوميكاسىنا ايتارلىقتاي ۇلەس قوسادى. بۇل مەموراندۋم سەرىكتەستىككە سەرپىن بەرىپ، قوعام دەنساۋلىعىن نىعايتۋعا سەپ بولادى»، - دەدى ا. سوي.

«نوبەل» كومپانياسى ديرەكتورلار كەڭەسىنىڭ ءتوراعاسى حاسان ۋلۋسوي قازاقستان ۇكىمەتىنىڭ قازىرگى جانە بولاشاقتاعى ينۆەستيتسيالىق جوبالارعا تارتىلعان شەتەلدىك كومپانيالارعا دەگەن سەنىمىنە العىسىن ءبىلدىردى.

«ينۆەستيتسيالىق جوبا بويىنشا مەموراندۋم - بۇل قازاقستانعا دەگەن سەنىمنىڭ كورىنىسى. جاڭا ءوندىرىس جوعارى تەحنولوگيالاردى پايدالانا وتىرىپ، بيوتەحنولوگيالىق پرەپاراتتار شىعارۋ جوسپارلانىپ وتىرعان العاشقى وندىرىستىك الاڭ بولادى»، - دەدى حاسان ۋلۋسوي.

ايتا كەتەيىك، 2020-جىلعا ارنالعان ءبىرىڭعاي ديستريبيۋتوردىڭ ءتىزىمى بويىنشا «نوبەل الماتى فارماتسيەۆتيكالىق فابريكاسى» ا ق ۇزاق مەرزىمدى شارتتار بويىنشا 15,8 ميلليارد تەڭگە سوماسىنا دارىلىك زاتتاردىڭ 91 اتاۋىن جەتكىزدى. 2020-جىلعا «نوبەل الماتى فارماتسيەۆتيكالىق فابريكاسى» ا ق- دان ساتىپ الۋدىڭ جالپى سوماسى 16,8 ميلليارد تەڭگەنى قۇرايدى.

2021 -جىلعا جالپى سوماسى 16,5 ميلليارد تەڭگەگە دارىلىك زاتتاردىڭ 88 اتاۋىن جەتكىزۋگە ۇزاق مەرزىمدى شارتتارعا قوسىمشا كەلىسىم جاسالدى.