كارانتين: دەنساۋلىق مينيسترلىگى شەتەلگە شىعۋدىڭ جاڭا ەرەجەلەرىن ءتۇسىندىردى
ەسكە سالساق، كوروناۆيرۋس پاندەمياسىنا بايلانىستى ەڭبەك ەتۋمەن، ەمدەلۋمەن، ستۋدەنتتەردىڭ ءجۇرىپ-تۇرۋىمەن بايلانىستى ءبىرقاتار كورسەتكىشتەردى جانە باسقا دا شۇعىل جاعدايلاردى قوسپاعاندا ق ر ازاماتتارىنىڭ، شەتەلدىكتەردىڭ جانە ازاماتتىعى جوق ادامداردىڭ قازاقستاننىڭ مەملەكەتتىك شەكاراسىن كەسىپ وتۋىنە شەكتەۋ قويىلعان.
بۇدان باسقا، 2020-جىلعى 11- قاراشادان باستاپ شەكارا ماڭى ەلدەرىندە ق ر ازاماتتارىنىڭ، قازاقستان رەسپۋبليكاسىنىڭ اۋماعىندا تۇرۋعا ىقتيارحاتى بار شەتەلدىك ازاماتتار مەن ازاماتتىعى جوق ادامداردىڭ مەملەكەتتىك شەكارانى كەسىپ ءوتۋى تارتىبىنە قويىلاتىن تالاپتار قوسىمشا كۇشەيتىلگەن بولاتىن.
وسىلايشا، مەملەكەتتىك شەكارانى كەسىپ ءوتۋ جيىلىگى: 30 تاۋلىكتە 1 رەتتەن 90 تاۋلىكتە 1 رەتكە دەيىن وزگەرتىلدى. بۇل شەكتەۋلەردىڭ مىنا ەرەكشە جاعدايلارعا قاتىسى جوق: ەمدەلۋگە بارۋ، وقۋ، ەڭبەك ەتۋ، وتباسى مۇشەلەرىن جەرلەۋ، وتباسىنىڭ اۋىر ناۋقاستانعان مۇشەلەرىن كۇتۋ ءۇشىن بارۋ جانە وزگە دە ماقساتتار.
2021-جىلعى 2- اقپاننان باستاپ ق ر اۋماعىندا كوروناۆيرۋس ينفەكتسياسىنىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ شەشىمىمەن ەلىمىزدىڭ مەملەكەتتىك شەكاراسىن كەسىپ ءوتۋ تارتىبىنە جەڭىلدەتۋدى كوزدەيتىن ءبىرقاتار وزگەرىس ەنگىزىلدى. وعان سايكەس، ق ر ازاماتتارى ءۇشىن دە، شەتەلدىكتەر مەن ازاماتتىعى جوق ادامدار ءۇشىن دە شەكارانى كەسىپ ءوتۋ جيىلىگى 3 ەسەگە ارتتىرىلدى (90 تاۋلىكتە 1 رەتتەن 30 تاۋلىكتە 1 رەتكە دەيىن).
سونداي-اق ق ر ازاماتتارى ءۇشىن دە، شەتەلدىكتەر مەن ازاماتتىعى جوق ادامدار ءۇشىن دە ەرەكشە جاعدايلارداعى (ەمدەلۋ، وقۋ، ەڭبەك ەتۋ، وتباسى مۇشەلەرىن جەرلەۋ، وتباسىنىڭ اۋىر ناۋقاستانعان مۇشەلەرىن كۇتۋ ءۇشىن بارۋ جانە ت. ب.) جەڭىلدىك جالعاساتىن بولادى.
بۇدان باسقا قازاقستان رەسپۋبليكاسى ۇكىمەتىنىڭ شەشىمىمەن تىكەلەي اۋە قاتىناسى قايتا باستالعان (تۇراقتى، تۇراقتى ەمەس چارتەرلىك رەيستەر) مەملەكەتتەردىڭ ازاماتتارىنا ق ر اۋماعىنا كىرۋىنە/ترانزيتپەن وتۋىنە/شىعۋىنا، ق ر ازاماتتارىنىڭ وسى مەملەكەتتەرگە ۇشۋىنا رۇقسات ەتىلگەن.
