قىزعىلت قار، سارى اسپان: تابيعاتتىڭ توسىن مىنەزى الەم ەلدەرىن الەككە سالۋدا
ماماندار گەرمانياعا جەل ارقىلى افريكا قۇمى جەتكەنىن ايتادى. چەحيادا دا قىزعىلت- سارى قار جاۋعان. ال يندونەزيانى قىزىل ءتۇستى سۋ باستى. يندونەزيادا سينابۋنگ جانارتاۋى اتقىلاي باستادى. كۇل مەن ءتۇتىننىڭ بيىكتىگى جارتى مەتردەن اسادى. ازىرگە جاقىن ماڭداعى تۇرعىنداردى ەۆاكۋاتسيالاۋ جۇمىستارى باستالعان جوق. دەگەنمەن بيلىك جانارتاۋعا 3 شاقىرىمعا دەيىن جاقىنداماۋدى ەسكەرتىپ جاتىر.
بۇل سولتۇستىك سۋماترا ارالىنداعى جاعداي. ال ەلدىڭ باسقا ءبىر ءوڭىرى تاسقىن سۋمەن الەك بوپ جاتىر. مۇندا جاۋىن- شاشىن ماۋسىمى قاراشادان ناۋرىزعا دەيىن جالعاسادى. تولاسسىز نوسەر سالدارىنان ەل استاناسى دجاكارتانى سۋ باستى. ءبىر ساعات ىشىندە جەرگىلىكتى وزەندەردىڭ بىرىندەگى سۋ دەڭگەيى 20 سانتيمەترگە كوتەرىلگەن. بيلىك بالالار مەن قارتتاردى ەۆاكۋاتسيالاۋعا كىرىسكەن.
يستي باروكا، دجاكارتا تۇرعىنى:
- زاتتارىمىزدى ەكىنشى قاباتقا كوتەرىپ قويدىق. ەگەر سۋ وسى دەڭگەيدەن اسپاسا، ەشقايدا بارماي- اق ۇيدە قالامىز. ءبىراق تاعى كوتەرىلسە، ەۆاكۋاتسيالاۋ ورتالىعىنا كوشۋدەن باسقا امال قالمايدى.
يندونەزياداعى اۋىلداردىڭ بىرىندە كوشەدەگى قىزىل ءتۇستى سۋ جەلى قولدانۋشىلارى اراسىندا قىزۋ تالقىعا تۇسكەن. مۇندا ماتا وڭدەيتىن سەحتى سۋ باسىپ، حيميالىق بوياعىش جان- جاققا جايىلىپ كەتكەن ەكەن. يندونەزيالىقتار قىزىل سۋدىڭ بەينەجازباسىمەن ءبولىسىپ جاتسا، نەمىس حالقى سارى اسپاننىڭ سۋرەتتەرىن جاريالاپ جاتىر.
بۇل شتۋتگارت قالاسىندا بولعان وقيعا. ماماندار شاھار ءۇشىن سيرەك كەزدەسەتىن جاعداي ەكەنىن ايتادى. ولار بارىنە ساحارادان جەلمەن كەلگەن قۇم سەبەپ دەيدى. گەرمانيانىڭ ورتالىق جانە سولتۇستىك وڭىرلەرىنىڭ حالقىن قالىڭ قار مەن كوكتايعاق الەككە سالدى. سالدارىنان كولىك قوزعالىسى قيىنداعان. تەمىر جول قاتىناسى دا ىركىلىسپەن جۇمىس ىستەدى. تابيعاتتىڭ توسىن مىنەزى ەكپە جۇمىستارىنا دا اسەر ەتتى. ماسەلەن، زانگەرحاۋزەن قالاسىندا ۆاكتسينالاۋ ورتالىعىنىڭ قىزمەتكەرلەرى جۇمىسقا جەتە الماي قالعان. سونىمەن قوسا اۋا رايىنىڭ قولايسىزدىعىنا بايلانىستى بىرنەشە فۋتبول ماتچى كەيىنگە شەگەرىلگەن. ال باۆاريادا بۇگىن وقۋشىلار ساباققا بارمادى. ماماندار قار ءالى جاۋاتىنىن ەسكەرتىپ وتىر.
www.24.kz
