اۋدان اكىمدەرىنىڭ ەسەبى: استانالىقتار قانداي ماسەلەلەر كوتەردى؟
بۇل تۋرالى نۇر-سۇلتان باسشىسى التاي كولگىنوۆ Instagram-پاراقشاسىندا جازدى، دەپ حابارلايدى قازاقپارات.
«ءارقايسىسىنا ونلاين جانە وفلاين رەجيمىندە قاتىستىم. قالا تۇرعىندارىنىڭ سۇراقتارىنىڭ ءبىر بولىگى شەشىمىن تاپتى»، - دەدى ا. كولگىنوۆ.
اتاپ ايتقاندا، بايقوڭىر اۋدانىنىڭ تۇرعىندارى 8№ ەمحاناعا قاتىستى ماسەلەنى كوتەردى. ناتيجەسىندە نۇر-سۇلتان اكىمى مەديتسينالىق مەكەمەگە كۇردەلى جوندەۋ جۇرگىزۋدى تاپسىردى. سونداي-اق، قالا تۇرعىندارىنىڭ ءوتىنىشى بويىنشا 18№ «اياجان» بالاباقشاسىنا كۇردەلى جوندەۋ جاسالاتىن بولدى. ال 87№ ورتا مەكتەپتىڭ ەلەكترمەن جابدىقتاۋ ماسەلەسى شەشىلەدى.
«بۇدان بولەك، ۇركەر (ەسىل اۋدانى) ەلدى مەكەنىنىڭ تۇرعىندارى ءورت ءسوندىرۋ دەپوسىن اشۋ ماسەلەسىمەن جۇگىندى. جوبالاۋ-سمەتالىق قۇجاتتامانى ازىرلەۋگە كىرىسۋدى، سودان كەيىن وسى ەلدى مەكەندە ءورت ءسوندىرۋ ءبولىمىنىڭ قۇرىلىسىنا كىرىسۋدى تاپسىردىم. سونداي-اق، الماتى جانە سارىارقا اۋداندارىنىڭ ءبىرقاتار كوشەسىندە كوشە جارىعى ورناتىلدى.
اباتتاندىرۋ، جىلى ايالدامالاردى ورناتۋ، اسفالتتاۋ، اپاتتى ەسكى ۇيلەردى بۇزۋ، تۇرعىن ءۇي كەشەنىن جوندەۋ كەستەسىنە قالانىڭ بارلىق اۋداندارىنىڭ مەكەنجايلارى ەنگىزىلدى. كەلىپ تۇسكەن سۇراقتار قىسقا مەرزىمدى، ورتا مەرزىمدى جانە ۇزاق مەرزىمدى بولىپ ءبولىندى. كوتەرىلگەن ماسەلەلەر جۇمىس جوسپارىنا الىندى. ءوزىمنىڭ حالىققا ەسەپ بەرۋ كەزدەسۋىم 10- اقپاندا ونلاين رەجيمىندە وتەدى. ءبىز ءۇشىن قالا تۇرعىندارىن قالانى دامىتۋعا تارتۋ، قالا تۇرعىندارىنىڭ وتىنىشتەرىن جۇمىس جوسپارىنا ەنگىزۋ وتە ماڭىزدى»، - دەپ جازدى التاي كولگىنوۆ.
